ایران میں اسرائیل کیلئے جاسوسی کے الزام میں نیوکلئیر سائنسدان سمیت 2 افراد کو پھانسی

تہران (ڈیلی اردو/نیوز ایجنسیاں) ایران نے اسرائیل کے لیے جاسوسی اور شدت پسند تنظیم دولت اسلامیہ سے مبینہ تعلقات کے الزامات پر دو افراد کو پھانسی دے دی ہے، جن میں ایک نیوکلئیر سائنسدان بھی شامل ہے۔

ایرانی عدلیہ سے منسلک میزان نیوز ایجنسی کے مطابق پھانسی پانے والے افراد کی شناخت روزباہ ویدی اور مہدی اصغر زادہ کے نام سے ہوئی ہے۔

میزان نیوز ایجنسی کے مطابق روزباہ ویدی، جو نیوکلئیر انجینئرنگ میں پی ایچ ڈی تھے، ایران کے ایک "اہم اور حساس ادارے" میں کام کرتے ہوئے اسرائیلی خفیہ ایجنسی موساد کے لیے جاسوسی کر رہے تھے۔ تاہم، ان کی گرفتاری کی تاریخ ظاہر نہیں کی گئی۔

ایران کی امیر کبیر یونیورسٹی آف ٹیکنالوجی کے مطابق ویدی کا تعلق ایران کی اٹامک انرجی آرگنائزیشن کے تحت نیوکلئیر سائنس اینڈ ٹیکنالوجی ریسرچ انسٹیٹیوٹ سے تھا۔ یونیورسٹی کے نیوز لیٹر میں بتایا گیا کہ ویدی نے سنہ 2011 میں دو دیگر نیوکلئیر سائنسدانوں کے ساتھ ایک تحقیقی مقالہ شائع کیا تھا، جنہیں حالیہ اسرائیل-ایران کشیدگی کے دوران ہلاک کر دیا گیا تھا۔

دوسری جانب، مہدی اصغر زادہ پر شدت پسند تنظیم دولت اسلامیہ (داعش) سے وابستگی، شام و عراق میں عسکری تربیت حاصل کرنے اور ایران میں تخریبی کارروائیوں کی منصوبہ بندی کے الزامات تھے۔ انسانی حقوق کی ایک ایرانی تنظیم کے مطابق، اصغر زادہ کو سنہ 2016 میں شام سے واپسی پر گرفتار کیا گیا تھا، اور انہیں دو سال قبل سزائے موت سنائی گئی تھی، جس پر اب عمل درآمد کیا گیا۔

اسی تنظیم کا کہنا ہے کہ ایران نے 29 جون سے 29 جولائی کے ایک ماہ کے دوران 1404 افراد کو پھانسی دی، جو کہ عالمی سطح پر شدید تشویش کا باعث بن رہی ہے۔

ایرانی حکام کی جانب سے اس خبر پر مزید تبصرہ یا تفصیل تاحال جاری نہیں کی گئی ہے۔