ایران میں اسرائیلی جاسوسی کے الزام میں ایک شخص کو پھانسی دے دی گئی

تہران(ڈیلی اردو) ایران میں حکام نے اسرائیلی خفیہ ایجنسی موساد کے لیے مبینہ جاسوسی اور حساس فوجی تنصیبات سے متعلق معلومات فراہم کرنے کے الزام میں ایک شخص کو پھانسی دے دی۔

ایرانی عدلیہ سے وابستہ خبر رساں ادارے میزان کے مطابق حسین بیداران کو جاسوسی اور اسرائیل کے ساتھ خفیہ تعاون کے الزام میں سزائے موت سنائی گئی تھی، جس کی سپریم کورٹ نے بھی توثیق کردی تھی۔

ایرانی حکام کا کہنا ہے کہ بیداران نے وسطی ایران کے صوبہ اصفہان میں موجود حساس فوجی اور میزائل تنصیبات سے متعلق معلومات موساد کو فراہم کیں اور اس کے بدلے مالی فائدہ حاصل کیا۔

دوسری جانب اقوام متحدہ کے انسانی حقوق کے ہائی کمشنر وولکر ترک نے ایران میں سزائے موت کے استعمال پر تشویش کا اظہار کیا ہے۔ ان کے مطابق 19 مارچ کے بعد ایران میں قومی سلامتی سے متعلق الزامات کے تحت کم از کم 56 افراد کو پھانسی دی جاچکی ہے۔

ایرانی حکام سزائے موت کے استعمال کا دفاع کرتے ہوئے اسے ملکی قانون کا حصہ اور عوامی سلامتی کے تحفظ کے لیے ضروری قرار دیتے ہیں، جبکہ انسانی حقوق کے ادارے منصفانہ عدالتی کارروائی سے متعلق خدشات کا اظہار کرتے رہے ہیں۔