ایران میں موساد کیلئے جاسوسی کے الزام میں ایک اور شخص کو پھانسی دے دی گئی

تہران (ڈیلی اردو) ایران نے بدھ کے روز اسرائیلی خفیہ ادارے موساد کے لیے مبینہ جاسوسی کے الزام میں ایک اور شخص کو پھانسی دے دی۔ 

ایرانی عدلیہ کی ویب سائٹ میزان کے مطابق سزائے موت پر سپریم کورٹ کی توثیق کے بعد عملدرآمد کیا گیا۔ عدلیہ کے مطابق مذکورہ شخص کو اسرائیلی بیرونی خفیہ ایجنسی نے آن لائن بھرتی کیا تھا اور وہ حساس معلومات اکٹھی کر رہا تھا۔

حکام کا کہنا ہے کہ اس نے تصاویر اور ویڈیوز بھی منتقل کیں۔ ایسے الزامات اس سے قبل دیگر سزائے موت کے مقدمات میں بھی سامنے آ چکے ہیں۔

جون سن 2025 میں ایران پر اسرائیلی فوجی حملوں کے بعد مبینہ جاسوسی کے الزامات کے تحت ملک بھر میں گرفتاریاں ہوئیں، جن کے سلسلے میں اب تک کم از کم 10 افراد کو پھانسی دی جا چکی ہے۔

ایرانی حکومت اور عدالتی حکام ملک میں جاری حالیہ سیاسی عدم استحکام کے لیے اسرائیل اور امریکہ کے مبینہ ‌کردار کو مورد الزام ٹھہراتے آئے ہیں۔ ایران میں ملک گیر احتجاج دسمبر کے آخر میں معاشی بحران کے خلاف غصے کے باعث شروع ہوا تھا، جبکہ 8 اور 9 جنوری کو بڑے مظاہرے ہوئے، جنہیں سکیورٹی فورسز نے سختی سے کچل دیا۔ کارکنوں کا کہنا ہے کہ ان کے پاس ہزاروں ہلاکتوں سے متعلق مصدقہ معلومات موجود ہیں۔

انسانی حقوق کی تنظیمیں طویل عرصے سے ایران میںسزائے موت کے استعمال پر تنقید کرتی رہی ہیں اور حکام پر الزام لگاتی ہیں کہ پھانسیوں کو بنیادی طور پر خوف پھیلانے کے لیے استعمال کیا جا رہا ہے۔

امریکہ میں قائم انسانی حقوق کی تنظیم ہیومن رائٹس ایکٹیوسٹس اِن ایران کے مطابق گزشتہ سال ایران میں دو ہزار سے زائد افراد کو پھانسی دی گئی، جو کئی دہائیوں میں سب سے زیادہ تعداد ہے۔