ایران پر 15 ہزار سے زائد بم گرائے گئے، اسرائیلی آرمی چیف

یروشلم (ڈیلی اردو) اسرائیل کے مطابق 28 فروری سے جاری جنگ کے دوران ایران پر 15 ہزار سے زائد بم گرائے گئے ہیں۔ 

اسرائیلی فوج کے سربراہ ایال زامیر کے مطابق یہ تعداد گزشتہ سال ایران کے خلاف مختصر جنگ کے دوران گرائے گئے بموں کی مقابلے میں چار گنا زیادہ ہے۔ تاہم رپورٹس کے مطابق ابتدائی دنوں کے مقابلے میں بمباری کی رفتار میں کمی آئی ہے۔

جنگ کے آغاز میں اسرائیل اور امریکہ ایران پر روزانہ تقریباً 1,000 بم گرا رہے تھے، جبکہ حالیہ دنوں میں یہ تعداد بعض اوقات کم ہو کر 200 بم روزانہ رہ گئی ہے۔ 

یہ اعداد و شمار جنگ کی شدت اور اس کے وسیع اثرات کو ظاہر کرتے ہیں، جو پہلے ہی خطے اور عالمی معیشت پر گہرے اثرات ڈال رہے ہیں۔

ایرانی حمایت یافتہ لبنانی تنظیم حزب اللہ کے سربراہ نعیم قاسم نے بدھ کو کہا ہے کہ اسرائیل کے ساتھ جاری حملوں کے دوران مذاکرات لبنان کے لیے ’’ہتھیار ڈالنے‘‘ کے مترادف ہوں گے۔ 

انہوں نے لبنانی صدر کی جانب سے براہ راست مذاکرات کی تجویز کو مسترد کرتے ہوئے کہا کہ ایسے وقت پر بات چیت قابل قبول نہیں جب اسرائیل لبنانی سرزمین پر قبضہ کیے ہوئے ہے اور روزانہ حملے کر رہا ہے۔

نعیم قاسم نے لبنانی عوام سے قومی اتحاد کی اپیل کرتے ہوئے بیروت حکومت پر زور دیا کہ وہ دومارچ کے فیصلے کو واپس لے، جس کے تحت حزب اللہ کی عسکری سرگرمیوں پر پابندی عائد کر دی گئی تھی۔