ایران پر امریکی حملہ؟ عالمی دارالحکومتوں میں ہائی الرٹ

لندن (ڈیلی اردو) مشرقِ وسطیٰ ایک بار پھر شدید کشیدگی کی لپیٹ میں آ گیا ہے، جہاں ایران پر ممکنہ امریکی حملے سے متعلق خطرے کی گھنٹیاں بجنے لگی ہیں۔

برطانوی خبر ایجنسی نے مغربی فوجی ذرائع کے حوالے سے دعویٰ کیا ہے کہ تمام شواہد اس بات کی نشاندہی کر رہے ہیں کہ ایران پر عنقریب حملہ ہو سکتا ہے۔

رپورٹ کے مطابق مغربی فوجی حکام کا کہنا ہے کہ غیر متوقع اقدامات امریکی عسکری حکمتِ عملی کا اہم حصہ ہوتے ہیں، اسی لیے صورتحال کو جان بوجھ کر غیر واضح رکھا جا رہا ہے۔ اس پیش رفت کے ساتھ ہی سفارتی سطح پر بھی غیر معمولی سرگرمیاں دیکھی جا رہی ہیں۔

میڈیا رپورٹس کے مطابق برطانیہ نے ایران سے اپنا تمام سفارتی عملہ واپس بلا لیا ہے، جبکہ برطانوی سفیر کو بھی تہران سے وطن واپس طلب کر لیا گیا ہے۔ اس اقدام کو ممکنہ فوجی کارروائی سے جوڑا جا رہا ہے۔

دوسری جانب امریکی صدر ڈونلڈ ٹرمپ ایران میں مظاہرین پر تشدد اور پھانسیوں کے معاملے پر پہلے ہی سنگین نتائج کی دھمکی دے چکے ہیں۔

وائٹ ہاؤس کے اوول آفس میں گزشتہ رات ایک پریس بریفنگ کے دوران امریکی صدر نے اعتراف کیا کہ ایران میں مظاہرین کے خلاف طاقت کے استعمال میں کچھ حد تک کمی آئی ہے۔

ادھر ایک اسرائیلی اخبار نے دعویٰ کیا ہے کہ ایران پر ممکنہ حملہ چند دن کے لیے مؤخر کر دیا گیا ہے، کیونکہ حالیہ دنوں میں تہران سے مظاہرین کی ہلاکتوں کی خبروں میں کمی آئی ہے۔

امریکی حملے کے خدشے کے پیشِ نظر اسپین، پولینڈ، اٹلی اور بھارت سمیت کئی ممالک نے اپنے شہریوں کو فوری طور پر ایران چھوڑنے کی ہدایت جاری کر دی ہے۔

علاقائی سطح پر بھی خطرے کی فضا برقرار ہے۔ اطلاعات کے مطابق مشرقِ وسطیٰ میں قائم امریکی ایئر بیسز سے فوجیوں کے انخلا کا عمل شروع ہو چکا ہے۔

ادھر ایران نے سخت موقف اختیار کرتے ہوئے خبردار کیا ہے کہ اگر امریکا نے حملہ کیا تو خطے میں موجود امریکی فوجی اڈے محفوظ نہیں رہیں گے۔