ایران پر امریکی حملے دوبارہ شروع، کویت میں میزائل اور ڈرون حملے

واشنگٹن / تہران (ڈیلی اردو) امریکی فوج نے ایران میں نئے حملے کرتے ہوئے ساحلی شہر بندر عباس کے ایک فوجی مقام کو نشانہ بنایا ہے، جبکہ امریکی سینٹرل کمانڈ (سینٹکام) نے دعویٰ کیا ہے کہ اس نے آبنائے ہرمز کے قریب چار ایرانی ڈرون بھی مار گرائے۔

سینٹکام کے مطابق امریکی فورسز نے بندر عباس میں اس فوجی مقام کو اس وقت نشانہ بنایا جب وہاں سے پانچواں ڈرون لانچ کیے جانے کی تیاری کی جا رہی تھی۔ ایرانی میڈیا کے مطابق شہر کے مشرقی حصوں میں دھماکوں کی آوازیں بھی سنی گئیں۔

امریکی فوج کا کہنا ہے کہ یہ کارروائیاں ایک ’محتاط دفاعی عمل‘ کے تحت کی گئیں، جبکہ یہ حملے ایسے وقت میں سامنے آئے ہیں جب امریکہ اور ایران کے درمیان نازک جنگ بندی برقرار ہے اور جنگ کے خاتمے کے لیے مذاکرات جاری ہیں۔

اس سے قبل پیر کے روز بھی امریکہ نے جنوبی ایران میں حملے کیے تھے جن میں مبینہ طور پر میزائل اڈوں اور ان کشتیوں کو نشانہ بنایا گیا تھا جن پر بارودی سرنگیں بچھانے کے الزامات عائد کیے گئے تھے۔

دوسری جانب ایران نے ان حملوں کو جنگ بندی کی سنگین خلاف ورزی قرار دیتے ہوئے کہا ہے کہ ہر حملے کا جواب دیا جائے گا۔ ایرانی پاسدارانِ انقلاب نے دعویٰ کیا ہے کہ اس نے ایک امریکی ڈرون مار گرایا جبکہ ایک لڑاکا طیارے اور ایک اور ڈرون پر بھی فائرنگ کی گئی۔

ادھر کویتی فوج نے اپنے سرکاری بیان میں کہا ہے کہ ملک کا فضائی دفاعی نظام اس وقت دشمن کے میزائل اور ڈرون حملوں کا مقابلہ کر رہا ہے۔ کویتی حکام نے شہریوں سے سکیورٹی ہدایات پر عمل کرنے کی اپیل بھی کی ہے۔