ایران پر نئے فضائی حملوں سے قبل نیتن یاہو کی امریکی صدر ٹرمپ کو بریفنگ دینے کی تیاری

واشنگٹن (ڈیلی اردو/این بی سی نیوز) ایران کے خلاف ممکنہ نئے فضائی حملوں کے تناظر میں اسرائیلی وزیراعظم بینجمن نیتن یاہو امریکی صدر ڈونلڈ ٹرمپ کو ایک اہم بریفنگ دینے کا ارادہ رکھتے ہیں۔

امریکی نشریاتی ادارے این بی سی نیوز کے مطابق نیتن یاہو صدر ٹرمپ کو آگاہ کریں گے کہ اگر ایران نے اپنے بیلسٹک میزائل پروگرام میں مزید توسیع کی تو اس سے پیدا ہونے والے خطرات اس حد تک بڑھ سکتے ہیں کہ ایرانی تنصیبات پر دوبارہ فضائی حملے ناگزیر ہو جائیں گے۔

رپورٹ میں کہا گیا ہے کہ اس مجوزہ بریفنگ میں اسرائیلی وزیراعظم اس مؤقف کو واضح کریں گے کہ ایران کی جانب سے میزائل صلاحیت میں پیش رفت خطے کی سلامتی کے لیے سنگین خطرہ بن سکتی ہے، جس کے جواب میں عسکری کارروائی پر غور کیا جا سکتا ہے۔

این بی سی نیوز کے مطابق اسرائیلی حکام اس بات پر بھی تشویش کا اظہار کر رہے ہیں کہ ایران یورینیم کی افزودگی کے لیے استعمال ہونے والی اپنی بعض جوہری تنصیبات کو دوبارہ فعال کرنے کی کوشش کر رہا ہے۔ یہ تنصیبات رواں سال جون میں اسرائیل اور امریکہ کی جانب سے کیے گئے فضائی حملوں کے دوران شدید طور پر متاثر ہوئی تھیں۔

اسی پس منظر میں اسرائیلی حکام امریکی صدر کو بریفنگ دینے کی تیاری کر رہے ہیں، جس میں یہ بھی زیرِ غور آئے گا کہ اگر ایران نے میزائل اور جوہری پروگرام کو آگے بڑھایا تو اس کی روک تھام کے لیے کن اہداف کو نشانہ بنایا جا سکتا ہے اور ممکنہ عسکری آپشنز کیا ہوں گے۔

اس پیش رفت کو خطے میں بڑھتی ہوئی کشیدگی کے تناظر میں انتہائی اہم قرار دیا جا رہا ہے۔