ایران کا آبنائے ہرمز کھولنے سے متعلق امریکی تجویز پر غور، جواب چند روز میں متوقع

تہران(ڈیلی اردو) ایران نے آبنائے ہرمز کو دوبارہ کھولنے سے متعلق امریکی تجویز پر غور شروع کر دیا ہے، جبکہ ایرانی وزیر خارجہ عباس عراقچی کا کہنا ہے کہ تہران آئندہ چند روز میں واشنگٹن کو اپنے ردعمل سے آگاہ کر سکتا ہے۔

ایرانی خبر رساں ادارے تسنیم کے مطابق عباس عراقچی نے جمعرات کو کہا کہ ایران اور امریکا کے درمیان سفارتی کوششیں اب بھی جاری ہیں اور تہران امریکی جواب کا جائزہ لے رہا ہے۔ مجوزہ فارمولے کے تحت آبنائے ہرمز کو سات روز کے اندر دوبارہ کھولنے کی راہ ہموار ہونے کا امکان ظاہر کیا گیا ہے۔

عراقچی نے اس سے قبل غیر ملکی سفیروں اور سفارتی نمائندوں سے گفتگو میں کہا تھا کہ جنگ اور مزید پابندیاں ایران اور امریکا کے درمیان تنازع کا حل نہیں ہیں۔ ان کے مطابق ایران ایک ایسے معاہدے کے لیے سفارتی عمل میں واپس آنے پر تیار ہے جو تہران کے لیے منصفانہ اور قابل قبول ہو۔

ایرانی وزیر خارجہ نے واضح کیا کہ اگر امریکا بھی سفارت کاری کا راستہ اختیار کرے تو ایران مذاکرات کے لیے تیار ہے، تاہم اگر دوبارہ فوجی محاذ آرائی شروع ہوئی تو تہران اپنے دفاع کے لیے جواب دینے کا حق محفوظ رکھتا ہے۔

یہ پیش رفت ایسے وقت میں سامنے آئی ہے جب ایران اور امریکا کے درمیان براہِ راست مذاکرات میں تعطل دور کرنے کے لیے ثالثوں کے ذریعے رابطے جاری ہیں۔ تہران کی جانب سے سات نکاتی منصوبہ بھی پیش کیا گیا ہے، جسے ایران نے جون میں طے پانے والی عبوری مفاہمت کی بنیاد پر تیار کیا ہے۔

آبنائے ہرمز عالمی توانائی کی ترسیل کے لیے انتہائی اہم بحری گزرگاہ ہے، جہاں سے بڑی مقدار میں خام تیل اور دیگر توانائی کی مصنوعات عالمی منڈیوں تک پہنچتی ہیں۔ اس لیے آبنائے کی بندش یا دوبارہ کھولنے سے متعلق کسی بھی پیش رفت کا اثر خطے کی سلامتی کے ساتھ ساتھ عالمی توانائی کی قیمتوں اور بحری تجارت پر بھی پڑ سکتا ہے۔

تہران اور واشنگٹن کے درمیان آئندہ چند روز میں ہونے والی پیش رفت کو آبنائے ہرمز کی صورتحال اور دونوں ممالک کے درمیان جاری سفارتی کوششوں کے حوالے سے اہم قرار دیا جا رہا ہے۔