ایران کا بیلسٹک میزائل حملہ: ڈیاگو گارشیا تک رسائی کی کوشش ناکام

واشنگٹن (ڈیلی اردو) دی وال اسٹریٹ جرنل نے امریکی حکام کے حوالے سے رپورٹ کیا ہے کہ ایران نے بحرِ ہند میں واقع برطانیہ اور امریکہ کے مشترکہ فوجی اڈے ڈیاگو گارشیا کی جانب دو درمیانے فاصلے تک مار کرنے والے بیلسٹک میزائل داغے، تاہم دونوں میزائل اپنے ہدف تک پہنچنے میں ناکام رہے۔

رپورٹ کے مطابق ایک میزائل دورانِ پرواز ہی ناکارہ ہو گیا، جبکہ دوسرے میزائل کو ایک امریکی جنگی جہاز سے داغے گئے انٹرسیپٹر کے ذریعے روکا گیا، تاہم یہ واضح نہیں ہو سکا کہ آیا اسے مکمل طور پر تباہ کیا گیا یا نہیں۔

یہ فوجی اڈہ ایرانی سرزمین سے تقریباً 2,500 میل (4,000 کلومیٹر) کے فاصلے پر واقع ہے۔ رپورٹ میں کہا گیا ہے کہ اس حملے سے ظاہر ہوتا ہے کہ تہران کے پاس پہلے کے اندازوں سے زیادہ طویل فاصلے تک مار کرنے والے میزائل موجود ہو سکتے ہیں۔

ایران کی جانب سے برطانیہ اور امریکہ کے اس مشترکہ فوجی اڈے کی طرف میزائل فائر کیے جانے کی اطلاعات سامنے آئیں، تاہم اس حملے میں تاحال کسی نقصان کی تصدیق نہیں ہو سکی۔

یہ واقعہ اس وقت ہوا جب برطانیہ نے امریکی افواج کو اپنے فوجی اڈوں کے اضافی استعمال کی اجازت دینے کا اعلان کیا تھا۔

برطانوی وزارت دفاع نے اس بات کی نہ تو تصدیق کی اور نہ ہی تردید کہ ایران نے ڈیاگو گارشیا کی طرف میزائل داغے، تاہم ایک بیان میں کہا گیا کہ ایران کے حملے خطے میں برطانیہ اور اس کے اتحادیوں کے مفادات کے لیے خطرہ بن چکے ہیں۔

یاد رہے کہ ڈیاگو گارشیا جزیرہ ایران کے جنوبی ترین علاقے پاسبندر سے تقریباً 3,800 کلومیٹر دور واقع ہے، جبکہ ماہرین کے مطابق ایران کے بیلسٹک اور کروز میزائلوں کی رینج عموماً 2,000 سے 2,500 کلومیٹر کے درمیان سمجھی جاتی رہی ہے۔