ایران کے اعلیٰ ترین مذاکراتی وفد قطر پہنچ گیا

تہران (ڈیلی اردو) ایران جنگ کے خاتمے کے لیے تہران کی طرف سے امریکہ کے ساتھ پاکستان کی ثالثی میں پہلے براہ راست اور پھر بالواسطہ امن مذاکرات کرنے والے اعلیٰ ترین مندوب محمد باقر قالیباف پیر 25 مئی کے روز خلیجی عرب ریاست قطر پہنچ گئے۔

تہران سے ملنے والی رپورٹوں کے مطابق باقر قالیباف، جو ایرانی پارلیمان کے اسپیکر بھی ہیں، اس لیے قطر کے دارالحکومت دوحہ گئے ہیں کہ ایران جنگ کے ’سفارتی عمل‘ کے ذریعے خاتمے کی کوششوں کو آگے بڑھایا جا سکے۔

ایران کی سرکاری نیوز ایجنسی اِرنا نے بتایا کہ محمد باقر قالیباف کی قیادت میں ایک ایرانی وفد پیر کے روز ایک ایسے دورے پر دوحہ پہنچ گیا، ’’جو جنگ کے خاتمے کے لیے سفارتی عمل کا حصہ ہے۔‘‘

اِرنا کے مطابق اس دورے کے دوران ایرانی قطری مذاکرات میں مشرق وسطیٰ میں جنگ کے خاتمے کی کوششوں پر تبادلہ خیال کیا جائے گا۔

اسی دوران ایران کے دو دیگر خبر رساں اداروں فارس اور تسنیم نے بتایا ہے کہ قطر جانے والے ایرانی وفد میں قالیباف کے علاوہ ملکی وزیر خارجہ عباس عراقچی اور ایران کے مرکزی بینک کے گورنر عبدالناصر ہمتی بھی شامل ہیں۔

اس سے پہلے پیر کی صبح متعدد مغربی خبر رساں اداروں نے یہ اطلاع دی تھی کہ ایرانی مرکزی بینک کے گورنر عبدالناصر ہمتی اس لیے قطر گئے ہیں کہ وہاں ایران کے بیرون ملک منجمد اثاثوں کے واگزار کیے جانے کے بارے میں بات چیت کر سکیں۔

قطر بھی ان ممالک میں شامل ہے جہاں ایران کے اثاثے منجمد ہیں۔ ہمتی کے دورہ قطر سے متعلق ابتدائی رپورٹوں میں یہ نہیں بتایا گیا تھا کہ آیا قالیباف اور عراقچی بھی قطر گئے ہیں یا انہیں بعد میں دوحہ جانا تھا۔