ایران کے دیمونا اور آراد پر بیلسٹک میزائل حملے، 135 اسرائیلی زخمی

یروشلم (ڈیلی اردو) ایران کے بیلسٹک میزائل حملوں میں اسرائیل کے جنوبی شہروں دیمونا اور آراد میں زخمی ہونے والے افراد کی تعداد 135 ہو گئی ہے، جن میں سے 10 کی حالت تشویشناک بتائی جا رہی ہے۔

اسرائیلی حکام کے مطابق میزائل حملوں کے بعد متعدد افراد کو ہسپتال منتقل کیا گیا، جہاں 88 افراد زیرِ علاج ہیں۔ ان میں سے 19 کی حالت درمیانی جبکہ 55 کو معمولی نوعیت کے زخم آئے ہیں۔

اسرائیل کی میگن ڈیوڈ ایڈوم ایمرجنسی سروس نے آراد میں سنیچر کی شام ہونے والے میزائل حملے کی تفصیلات جاری کرتے ہوئے بتایا کہ ریسکیو ٹیموں نے فوری کارروائی کرتے ہوئے زخمیوں کو طبی امداد فراہم کی۔

اسرائیلی وزیرِ اعظم نیتن یاہو نے آراد کے میئر سے رابطہ کیا اور اس صورتحال کو شہر کے لیے "انتہائی مشکل شام" قرار دیا۔ ان کا کہنا تھا کہ اسرائیل اپنے دشمنوں کے خلاف ہر محاذ پر حملے جاری رکھنے کے لیے پرعزم ہے۔

جنوبی اسرائیل کے شہر دیمونا میں بھی ایرانی میزائل حملے کے نتیجے میں مزید 47 افراد زخمی ہوئے۔ یہ علاقہ ایک اہم جوہری تنصیب کے قریب واقع ہے، جو دیمونا سے تقریباً 13 کلومیٹر کے فاصلے پر موجود ہے۔ 

اس تنصیب کے بارے میں طویل عرصے سے خیال کیا جاتا رہا ہے کہ اسے اسرائیل کے غیر اعلان شدہ جوہری پروگرام سے جوڑا جاتا ہے، اگرچہ سرکاری طور پر اسے تحقیقی مرکز قرار دیا جاتا ہے۔

ماہرین کے مطابق اسرائیل کو مشرقِ وسطیٰ میں جوہری صلاحیت رکھنے والا واحد ملک سمجھا جاتا ہے، اسی لیے ایسے حساس علاقوں پر حملوں کو انتہائی سنجیدگی سے لیا جاتا ہے۔

ایران نے خود اس بات کی تصدیق کی ہے کہ دیمونا پر حملہ اس کے نطنز جوہری مرکز پر ہونے والے امریکی اور اسرائیلی حملوں کے ردعمل میں کیا گیا۔

واضح رہے کہ اسرائیل اور امریکہ دونوں اس جنگ کا بنیادی مقصد ایران کی ممکنہ جوہری ہتھیار بنانے کی صلاحیت کو ختم کرنا قرار دیتے ہیں۔

دوسری جانب اسرائیلی حکام کا کہنا ہے کہ وہ اس بات کی تحقیقات کر رہے ہیں کہ ایرانی میزائل کس طرح جدید فضائی دفاعی نظام کو عبور کرتے ہوئے جنوبی شہر دیمونا تک پہنچنے میں کامیاب ہوا۔