باب المندب میں حوثی باغیوں کی مبینہ بارودی سرنگوں کی تنصیب، پہاڑوں میں خندقیں کھودنے کا انکشاف

صنعاء(ڈیلی اردو) یمن کے ایک فوجی ذریعے نے دعویٰ کیا ہے کہ حوثی باغیوں نے بحیرہ احمر اور خلیج عدن کو ملانے والی اہم آبی گزرگاہ باب المندب کے قریب سمندر میں بارودی سرنگیں نصب کی ہیں، جبکہ آبنائے پر نظر رکھنے والے پہاڑی علاقوں میں خندقیں بھی کھودی گئی ہیں۔

جرمن خبر رساں ادارے کے مطابق یمنی فوجی ذریعے نے بتایا کہ حوثی باغیوں نے باب المندب کے اطراف بلند پہاڑی مقامات پر دفاعی نوعیت کی خندقیں تیار کی ہیں اور سمندری راستے میں بھی بارودی سرنگیں بچھانے کی کارروائی کی ہے۔

ذرائع کے مطابق گزشتہ ماہ کے آخر میں بھی باب المندب کے ایک اہم حصے میں حوثی باغیوں کی جانب سے نصب کی گئی ایک سمندری بارودی سرنگ کا سراغ لگایا گیا تھا۔ یمنی بحریہ نے اسے ناکارہ بنا کر ممکنہ خطرہ ختم کرنے کے لیے ضروری اقدامات کیے تھے۔

باب المندب عالمی بحری تجارت کے لیے ایک اہم گزرگاہ ہے، اس لیے اس کے قریب بارودی سرنگوں کی موجودگی سے متعلق یہ اطلاعات خطے میں بحری سلامتی کے حوالے سے تشویش کا باعث بن سکتی ہیں۔