باب المندب کے قریب حوثیوں کی عسکری سرگرمیاں، ایرانی ماہرین کی آمد اور ریڈار تنصیب کا دعویٰ

صنعاء (ڈیلی اردو) یمن میں باب المندب اور بحیرہ احمر کے جنوبی حصے کے قریب حوثی باغیوں کی عسکری سرگرمیوں میں اضافے کی اطلاعات سامنے آئی ہیں۔ یمنی فوجی ذرائع کے مطابق حوثیوں نے اہم پہاڑی مقامات پر ریڈار نصب کرنے کے ساتھ نئی فوجی پوزیشنز قائم کرنا شروع کردی ہیں، جبکہ ایرانی پاسداران انقلاب کے ماہرین کی علاقے میں آمد کی بھی اطلاعات ہیں۔

ذرائع کے مطابق حوثیوں نے مغربی ساحلی علاقوں میں اپنے کنٹرول کے بعد باب المندب کی نگرانی کرنے والی پہاڑی چوٹیوں اور بحیرہ احمر میں واقع جزیرہ زقر پر بھی اپنی موجودگی مضبوط کی ہے۔

یمنی ذرائع کا کہنا ہے کہ ایرانی پاسداران انقلاب کے چار ماہرین مختلف اوقات میں المخا کی بندرگاہ، ہوائی اڈے اور باب المندب کے علاقوں کا دورہ کرچکے ہیں، جہاں انہوں نے حوثیوں کی میزائل فورس سے وابستہ عسکری قیادت سے ملاقاتیں کیں۔

دوسری جانب باب المندب سے متصل علاقوں میں یمنی حکومتی فورسز اور حوثی باغیوں کے درمیان جھڑپوں کی بھی اطلاعات ہیں۔ ذرائع کے مطابق حکومتی فورسز اور قبائلی جنگجوؤں نے بعض مقامات دوبارہ اپنے کنٹرول میں لیے، جبکہ اضافی نفری پہنچنے کے بعد لڑائی میں شدت آگئی۔

یمنی ذرائع کے مطابق باب المندب کے قریب کَہبوب کے پہاڑی محاذ پر بھی فریقین کے درمیان شدید جھڑپیں جاری ہیں، جہاں حوثی باغی اہم پہاڑی مقامات پر اپنی فوجی پوزیشنز مضبوط کرنے کی کوشش کر رہے ہیں۔