باجوڑ: امن جرگہ اور ٹی ٹی پی مذاکرات میں ڈیڈ لاک برقرار

باجوڑ (ڈیلی اردو) ضلع باجوڑ میں امن کے قیام کے لیے گرینڈ جرگہ اور کالعدم تحریک طالبان پاکستان (ٹی ٹی پی) کے درمیان مذاکرات کا ساتواں دور بھی نتیجہ خیز ثابت نہ ہو سکا اور ڈیڈ لاک برقرار ہے۔

جرگہ سربراہ حاجی ہاون الرشید کے مطابق دونوں فریقین کی کچھ شرائط ہیں جن کی وجہ سے بات چیت آگے نہیں بڑھ پا رہی۔ انہوں نے واضح کیا کہ جنگ کسی مسئلے کا حل نہیں، اس لیے مسائل کو مذاکرات کے ذریعے حل کرنا ضروری ہے۔ ان کا کہنا تھا کہ افغانستان کی حکومت کو بھی اس عمل میں کردار ادا کرنا چاہیے۔

ٹی ٹی پی کے تحریری بیان میں کہا گیا ہے کہ وہ صرف باجوڑ یا کسی ایک ضلع کی سطح پر مذاکرات کرنے یا ہتھیار ڈالنے پر راضی نہیں۔ تنظیم کا مؤقف ہے کہ مذاکرات پورے پاکستان کی سطح پر اجتماعی ہوں اور ان کے نتیجے میں شریعت کا نفاذ یقینی بنایا جائے، اس سے کم کسی شرط پر مذاکرات قبول نہیں کیے جائیں گے۔ ساتھ ہی عوامی مقامات کو جنگ سے دور رکھنے کی ہدایت بھی جاری کی گئی ہے۔