باجوڑ میں سکیورٹی فورسز کی گاڑی پر مبینہ خودکش دھماکا، ایک اہلکار ہلاک، میجر سمیت 6 زخمی

واشنگٹن (ش ح ط ) پاکستان کے شورش زدہ صوبے خیبر پختونخوا کے قبائلی ضلع باجوڑ میں عنایت کلے بازار کے قریب بائی پاس روڈ پر سکیورٹی فورسز کی گاڑی کو مبینہ طور پر خودکش دھماکے کا نشانہ بنایا گیا۔

سرکاری ذرائع کے مطابق دھماکے میں ایک اہلکار ہلاک جبکہ میجر سمیت 6 اہلکار زخمی ہوگئے۔ زخمی اہلکاروں کو قریبی اسپتال منتقل کر دیا گیا ہے۔

مقامی صحافیوں کا کہنا ہے کہ دھماکے کے فوراً بعد سکیورٹی فورسز نے شدید فائرنگ کی جس کے باعث بازار میں خوف و ہراس اور بھگدڑ مچ گئی۔ واقعے میں مزید چار عام شہری بھی زخمی ہوئے ہیں۔

سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے، تاہم ابھی تک کسی گروہ نے اس حملے کی ذمہ داری قبول نہیں کی۔