باجوڑ میں سیکیورٹی پوسٹ پر دھماکا، تین اہلکار زخمی

خار (نمائندہ ڈیلی اردو) خیبرپختونخوا کے قبائلی ضلع باجوڑ کی تحصیل ماموند میں سیکیورٹی فورسز کی ایک پوسٹ پر ہونے والے دھماکے میں تین اہلکار زخمی ہوگئے ہیں۔ دھماکا مقامی سیکیورٹی فورسز کی چیک پوسٹ کے قریب ہوا، جس کے نتیجے میں تین اہلکار شدید زخمی ہو گئے۔

مقامی ذرائع کے مطابق دھماکے کے بعد فوراً سیکیورٹی اہلکاروں نے علاقے کو گھیرے میں لے لیا اور زخمی اہلکاروں کو فوری طور پر ضلعی ہیڈکوارٹر ہسپتال منتقل کیا گیا جہاں ان کا علاج جاری ہے۔ پولیس اور سیکیورٹی فورسز نے دھماکے کی نوعیت کا جائزہ لینے اور ملزمان کی تلاش کے لیے تحقیقات کا آغاز کر دیا ہے۔

ابتدائی طور پر اس بات کا پتا نہیں چل سکا کہ دھماکا کسی دستی بم یا ریموٹ کنٹرول ڈیوائس سے کیا گیا تھا، تاہم سیکیورٹی فورسز کے اہلکاروں کا کہنا ہے کہ یہ ایک دہشت گردانہ حملہ تھا۔

فورسز کے ذرائع کے مطابق اس واقعے کے بعد علاقے میں سیکیورٹی مزید سخت کر دی گئی ہے اور تمام ممکنہ شواہد کو جمع کرنے کے لیے سرچ آپریشن بھی شروع کر دیا گیا ہے۔