باجوڑ میں عسکریت پسندوں کیخلاف فوج کا ’’ٹارگٹڈ آپریشن‘‘، بچے سمیت 3 شہری ہلاک

پشاور + خار (نمائندہ ڈیلی اردو/نیوز ایجنسیاں) پاکستانی فوج اور سکیورٹی فورسز نے خیبر پختونخوا کے سرحدی ضلع باجوڑ میں عسکریت پسندوں کے خلاف ’’ٹارگٹڈ آپریشن‘‘ شروع کر دیا ہے، جس کے باعث ہزاروں مقامی باشندے محفوظ مقامات کی جانب نقل مکانی کر رہے ہیں۔

اگرچہ اس کارروائی کا باضابطہ اعلان نہیں کیا گیا، لیکن سرکاری افسر سعید اللہ کے مطابق یہ بڑے پیمانے کی فوجی کارروائی نہیں، بلکہ شدت پسندوں کے مخصوص ٹھکانوں کو نشانہ بنایا جا رہا ہے تاکہ شہری جانی نقصان سے بچ سکیں۔ ایک اور سرکاری افسر شاہد علی نے بتایا کہ نقل مکانی کرنے والوں کی تعداد تیزی سے بڑھ کر تقریباً ایک لاکھ تک پہنچ گئی ہے۔

مقامی باشندوں کے مطابق سکیورٹی فورسز نے ہیلی کاپٹروں کی مدد سے سرحدی پہاڑی علاقوں میں بمباری کی۔ صوبائی پولیس چیف ذوالفقار حمید نے تصدیق کی کہ آپریشن جاری ہے۔

کالعدم تنظیم تحریک طالبان پاکستان (ٹی ٹی پی) کو افغان طالبان کا قریبی اتحادی سمجھا جاتا ہے۔ اگست 2021 میں افغان طالبان کے اقتدار میں آنے کے بعد متعدد ٹی ٹی پی رہنما اور جنگجو افغانستان میں منتقل ہوئے اور وہاں سے باجوڑ سمیت پاکستانی علاقوں میں حملے کیے۔ اس سے قبل 2009 میں بھی باجوڑ میں پاکستانی اور غیر ملکی جنگجوؤں کے خلاف بڑا فوجی آپریشن کیا گیا تھا، جس میں لاکھوں لوگ بے گھر ہوئے تھے۔

گولہ گرنے سے بچے سمیت تین افراد ہلاک

اسی دوران تحصیل ماموند کے علاقے ایراب میں ایک گھر پر گولہ گرنے سے گھر کا سربراہ، ایک خاتون اور سات سالہ بچہ ہلاک جبکہ دو افراد زخمی ہو گئے۔ عینی شاہدین کے مطابق یہ واقعہ اچانک پیش آیا، جس سے گھر میں ’’قیامت صغریٰ‘‘ کا منظر پیدا ہو گیا۔

اہلِ خانہ نے سوشل میڈیا پر ویڈیو جاری کرتے ہوئے سوال اٹھایا: “ہمارا سات سالہ بچہ، جس کے آپ نے ٹکڑے ٹکڑے کر دیے، یہ کون سا دہشت گرد تھا؟ اللہ کا واسطہ ہمیں امن سے جینے دیجیے۔”

بطور صحافی، ہلاک بچے کی تصویر شائع کرنا ممکن نہیں، ورنہ دنیا کو یہ مظالم دکھائے جاتے تاکہ سب حقیقت جان سکیں۔

مقامی افراد نے اس واقعے کی شدید مذمت کرتے ہوئے حکام سے مطالبہ کیا ہے کہ ایسے حملے فوری بند کیے جائیں اور متاثرہ خاندان کی مالی و اخلاقی مدد کی جائے۔