باجوڑ میں پاکستانی ڈرون حملہ: چار نوجوان ہلاک، دو شدید زخمی

واشنگٹن (ش ح ط)  پاکستان کے شورش زدہ صوبے خیبر پختونخوا کے ضلع باجوڑ کی تحصیل ماموند کے علاقے لغڑئی میں کھیتوں میں مبینہ ڈرون حملے کے نتیجے میں چار نوجوان ہلاک جبکہ دو شدید زخمی ہو گئے۔

پولیس حکام کے مطابق دھماکے کی نوعیت کا تاحال تعین نہیں ہو سکا۔ زخمیوں کو ابتدائی طبی امداد کے بعد سول ہسپتال خار سے ہیلی کاپٹر کے ذریعے پشاور منتقل کر دیا گیا۔

ہلاک ہونے والوں کی شناخت سجاد ولد مجید (18 سال)، نوشاد ولد سید رحمان (13 سال)، فواد ولد دلبر (18 سال) اور جواد ولد یوسف (15 سال) کے ناموں سے ہوئی ہے۔ زخمیوں میں وقاس ولد شیرزمان (17 سال) اور عطاء اللہ ولد گل ولی (15 سال) شامل ہیں۔

ضلعی پولیس افسر وقاص رفیق نے برطانوی خبر رساں ادارے بی بی سی سے گفتگو میں کہا کہ فی الحال یہ واضح نہیں کہ دھماکہ مارٹر گولے کا تھا یا کوئی دیسی ساختہ بم نصب کیا گیا تھا۔

تاہم، علاقے کے مکینوں اور مقامی نمائندوں نے واقعے کو ڈرون حملہ قرار دیا ہے۔ 

باجوڑ سے رکنِ قومی اسمبلی جاوید خان نے ایکس (X) پر اپنی پوسٹ میں کہا: ’’میری ضلعِ باجوڑ میں ڈرون حملہ ہوا ہے، جس میں چار بچے ہلاک اور چار زخمی ہوئے ہیں۔ باجوڑ میں کھیل رہے بچوں پر ‘نمبر ون’ کا ڈرون اٹیک ہوا۔ کسی قسم کی وضاحت پیش کرنے کی ضرورت نہیں ہے۔ یہ ڈرون حملہ ہے، کوئی گولہ استعمال نہیں ہوا۔ یہ ایک سیاسی فورس ہے۔ یہ جنگ آپ کے بس کی بات نہیں ہے۔ باجوڑ سے نکل جاؤ دس دنوں میں باجوڑ میں امن آ جائے گا۔‘‘

علاقے کے دیگر مکینوں نے بھی یہی دعویٰ کیا ہے کہ یہ واقعہ ڈرون حملے کا نتیجہ ہے، تاہم بعض اطلاعات میں کہا جا رہا ہے کہ دھماکہ گولہ پھٹنے سے ہوا۔

واقعے کے بعد علاقے میں خوف و ہراس کی فضا قائم ہے جبکہ پولیس تحقیقات کر رہی ہے۔