باجوڑ پولیس نے بم حملہ اور تھانے پر دہشت گردی ناکام بنا دی

خار (نمائندہ ڈیلی اردو) پاکستان کے شورش زدہ صوبے خیبرپختونخوا کے قبائلی ضلع باجوڑ میں پولیس نے تخریب کاری کی دو کوششوں کو ناکام بنا دیا۔ شرپسند عناصر کی طرف سے گنجان آباد عنایت کلے بازار میں نصب کردہ آئی ای ڈی کو پولیس اور سیکورٹی فورسز کی بم ڈسپوزل ٹیموں نے بروقت کارروائی کرتے ہوئے ناکارہ بنایا۔

واقعے کی اطلاع موصول ہوتے ہی ایس ایچ او تھانہ لوئی ماموند شیر زمین خان نفری کے ہمراہ موقع پر پہنچے اور علاقے کو گھیرے میں لے لیا۔ ترجمان باجوڑ پولیس کے مطابق بم ڈسپوزل کے ماہرین نے مہارت اور پیشہ ورانہ انداز میں بم کو کنٹرولڈ بلاسٹ کے ذریعے ناکارہ بنا کر بازار کو بڑی تباہی سے بچایا۔

دوسری جانب آج علی الصبح دہشت گردوں کی جانب سے تھانہ لوئی ماموند پر راکٹ حملہ کیا گیا، تاہم پولیس جوانوں نے بروقت اور مؤثر جوابی کارروائی کرتے ہوئے دہشت گردوں کے عزائم ناکام بنا دیے۔ حملے کے نتیجے میں کسی قسم کا جانی نقصان نہیں ہوا۔

ڈسٹرکٹ پولیس آفیسر باجوڑ نے جوانوں کی جرات و بہادری کو سراہا اور کہا کہ پولیس پوری قوت اور عزم کے ساتھ امن دشمن عناصر کے خلاف سرگرم ہے اور فتنہ الخوارج کے مذموم عزائم کو ہر صورت ناکام بنایا جائے گا۔