باجوڑ: پولیو ٹیم پر فائرنگ، پولیس اور شہری ہلاک، شہری نے حملہ آور پکڑنے کی کوشش کی

خار (نمائندہ ڈیلی اردو)  پاکستان کے شورش زدہ صوبے خیبر پختونخوا کے قبائلی ضلع باجوڑ کی تحصیل سالارزئی کے علاقے تنگی میں انسداد پولیو مہم کی ٹیم پر فائرنگ کے نتیجے میں ایک پولیس اہلکار اور ایک شہری ہلاک ہو گئے۔

ضلعی پولیس افسر وقاص رفیق نے صحافیوں کو بتایا کہ تین نقاب پوش مسلح افراد نے ٹیم پر حملہ کیا، تاہم انسداد پولیو ٹیم کے کارکن محفوظ رہے۔

عینی شاہدین نے ڈیلی اردو کو بتایا کہ فائرنگ کے دوران مقامی شخص نے حملہ آوروں کو پکڑنے کی کوشش کی، لیکن ٹارگٹ کلر نے اس پر بھی فائرنگ کر دی، جس کے نتیجے میں سویلین شہری فضل حیان ہلاک ہو گئے۔ یاد رہے کہ فضل حیان چند روز قبل سعودی عرب سے اپنے ملک واپس آئے تھے۔

فضل حیان کی بہادری کی عوام اور بعض حلقوں نے تعریف کی ہے، اور ان کے لیے ایوارڈ دینے کا مطالبہ بھی سامنے آیا ہے۔

پولیس کے مطابق فائرنگ کے بعد علاقے میں سرچ آپریشن شروع کر دیا گیا ہے تاکہ حملہ آوروں کو گرفتار کیا جا سکے۔