باجوڑ، شمالی وزیرستان، بنوں اور خیبر میں آپریشنز اور دہشتگردوں کی کارروائیاں

پشاور (نمائندگان ڈیلی اردو) پاکستان کے قبائلی ضلعوں میں سکیورٹی فورسز کی کارروائیوں اور دہشتگردوں کی تازہ کارروائیوں کے درمیان خطرات برقرار ہیں۔

باجوڑ: سکیورٹی فورسز نے تحصیل ماموند اور گاؤں ترخو سمیت متعدد علاقوں کو کلیئر کر دیا ہے، جس کے بعد متاثرہ خاندانوں کی واپسی کا عمل مرحلہ وار شروع ہو گیا ہے۔ ضلعی انتظامیہ نے متاثرہ خاندانوں کے صبر اور قربانیوں کو سراہا۔ واضح رہے کہ دہشتگردوں کے خلاف جاری آپریشن کے دوران کئی علاقوں کو خالی کروا لیا گیا تھا اور متاثرین کے لیے خار اسپورٹس کمپلیکس اور متعدد سرکاری اسکولوں میں عارضی خیمہ بستی قائم کی گئی تھی۔

اسی دوران لوئے ماموند کے علاقے زگئی میں دہشتگردوں کے بارود کے خود دھماکے کے نتیجے میں ایک دہشتگرد ہلاک اور تین زخمی ہو گئے۔ ہلاک دہشتگرد کی لاش برہ زگئی میں پڑی ہوئی ہے۔

شمالی وزیرستان: ضلعی انتظامیہ نے 23 اگست بروز ہفتے کی صبح 5 بجے سے 24 اگست بروز سوموار کی صبح 7 بجے تک مکمل کرفیو نافذ کر دیا ہے۔ اس دوران ضلع بھر میں ہر قسم کی نقل و حرکت، تجارتی مراکز اور مارکیٹس بند رہیں گی۔ انتظامیہ نے عوام سے اپیل کی ہے کہ وہ کرفیو کے دوران قانون نافذ کرنے والے اداروں کے تعاون کو یقینی بنائیں۔

بنوں: ضلع کے علاقے جانی خیل میں سکیورٹی فورسز اور دہشتگردوں کے درمیان شدید فائرنگ کا تبادلہ جاری ہے۔ مقامی ذرائع کے مطابق سکیورٹی فورسز نے خفیہ اطلاعات کی بنیاد پر دہشتگردوں کے ٹھکانوں کو نشانہ بنایا، تاہم ہلاکت یا جانی نقصان کی تفصیلات ابھی موصول نہیں ہوئیں۔

خیبر: تحصیل باڑہ کے بر قمبر خیل علاقے شینکو میں "قاسا بجلی لائن" منصوبے کے ٹاور نمبر 232 کو شدت پسندوں نے بارودی مواد سے دھماکے کے ذریعے تباہ کر دیا۔ خوش قسمتی سے واقعے میں کسی جانی نقصان کی اطلاع موصول نہیں ہوئی۔