باجوڑ، مہمند اور بنوں میں پولیس و فورسز کی کارروائیاں اور دہشت گرد حملے، 6 ہلاک، ایک اغوا

پشاور (نمائندگان ڈیلی اردو) پاکستان کے شورش زدہ صوبے خیبرپختونخوا کے مختلف اضلاع میں سیکیورٹی فورسز اور دہشت گردوں کے درمیان جھڑپوں اور کارروائیوں کے نتیجے میں کئی دہشت گرد ہلاک جبکہ ایک سرکاری اہلکار کو اغواء کر لیا گیا ہے۔

بنوں: دو دہشت گرد ہلاک

پولیس حکام کے مطابق بنوں کے علاقے پیردل خیل میں کاؤنٹر ٹیررازم ڈیپارٹمنٹ (سی ٹی ڈی) اور پولیس نے مشترکہ کارروائی کی۔ کارروائی کے دوران کالعدم تحریک طالبان پاکستان (ٹی ٹی پی) کے دو دہشت گرد عظیم اللہ اور سلیمان ہلاک ہو گئے۔ حکام کے مطابق ملزمان کے قبضے سے بھاری مقدار میں اسلحہ اور بارودی مواد برآمد کر لیا گیا۔

بنوں: محکمہ صحت کا اہلکار اغواء

ضلع بنوں ہی کے علاقے لنڈی ڈاک میں گزشتہ رات دہشت گردوں نے محکمہ صحت کے اہلکار سمیع اللہ کو ان کے گھر سے اغواء کر لیا۔

مقامی ذرائع کے مطابق مسلح افراد رات گئے گھر میں داخل ہوئے اور اہلکار کو زبردستی اپنے ساتھ لے گئے۔ اغواء کے بعد علاقے میں خوف و ہراس پھیل گیا۔

باجوڑ: چار دہشت گرد ہلاک

ادھر باجوڑ میں سیکیورٹی فورسز نے افغان سرحد کی جانب سے دہشت گردوں کی دراندازی کی کوشش ناکام بنا دی۔ فورسز کے مطابق کارروائی کے دوران چار دہشت گرد ہلاک کر دیے گئے۔

مہمند: پولیس چیک پوسٹ پر حملہ

ضلع مہمند کے تحصیل صافی کے علاقے قندھاری آمان غنڈی میں تھانہ لکڑے کی پولیس چیک پوسٹ پر دہشت گردوں نے حملہ کیا۔

پولیس کے مطابق دہشت گردوں نے اچانک فائرنگ کی جس کے جواب میں پولیس نے بھرپور جوابی کارروائی کی۔ دونوں جانب سے فائرنگ کا تبادلہ کافی دیر تک جاری رہا۔ واقعے کے بعد پولیس کی بھاری نفری جائے وقوعہ کی جانب روانہ کر دی گئی۔