بدخشاں کے زیبک میں جھڑپ، 4 طالبان جنگجو ہلاک اور 7 زخمی ہونے کا دعویٰ

کابل(ڈیلی اردو) افغانستان کے شمال مشرقی صوبے بدخشاں کے ضلع زیبک میں افغان فریڈم فرنٹ (اے ایف ایف) اور طالبان فورسز کے درمیان مسلح جھڑپ کی اطلاعات سامنے آئی ہیں۔

افغان فریڈم فرنٹ نے دعویٰ کیا ہے کہ جھڑپ کے دوران طالبان کے 4 جنگجو ہلاک جبکہ 7 زخمی ہوئے۔ تنظیم کے مطابق اس کے جنگجوؤں اور طالبان فورسز کے درمیان مسلح تصادم زیبک میں ہوا۔

اے ایف ایف کا مزید کہنا ہے کہ جھڑپ میں زخمی اور ہلاک ہونے والے طالبان جنگجوؤں کو زیبک ڈسٹرکٹ کلینک اور فیض آباد کے ایک اسپتال منتقل کیا گیا۔

یہ واقعہ ایک ایسے وقت میں پیش آیا ہے جب افغانستان کے مختلف علاقوں میں طالبان مخالف گروپوں کی جانب سے مسلح کارروائیوں کا سلسلہ جاری ہے۔ طالبان حکومت ملک کے بیشتر حصوں پر کنٹرول رکھتی ہے تاہم بعض علاقوں میں اسے مسلح گروپوں کی جانب سے مزاحمت اور حملوں کا سامنا ہے۔

واقعے میں ہلاکتوں اور زخمیوں سے متعلق افغان فریڈم فرنٹ کے دعوے کی آزاد ذرائع سے تصدیق نہیں ہوسکی۔