برکس وزرائے خارجہ مشرقِ وسطیٰ تنازعے پر مشترکہ مؤقف اپنانے میں ناکام

نئی دہلی (ڈیلی اردو) برکس ممالک کے وزرائے خارجہ کا دو روزہ اجلاس جمعہ 15 مئی کو بھارتی دارالحکومت نئی دہلی میں اس وقت بغیر کسی مشترکہ اعلامیے کے ختم ہو گیا، جب مشرق وسطیٰ کی موجودہ صورتحال پر ’’کچھ ارکان کے درمیان اختلافات‘‘ سامنے آئے۔

میزبان ملک بھارت نے کہا کہ یہ اختلافات اس چیلنج کو ظاہر کرتے ہیں جو اس بلاک کو درپیش ہے، کیونکہ وہ اپنا عالمی اثر و رسوخ بڑھانے کی کوشش کر رہا ہے۔

ایک بھارتی بیان کے مطابق رکن ممالک نے خود مختاری، بحری سلامتی، اور مشرق وسطیٰ میں شہری انفراسٹرکچر اور عام شہریوں کے تحفظ جیسے معاملات پر ’’اپنے اپنے قومی موقف اور مختلف آراء‘‘ پیش کیں۔

بیان میں ایک فٹ نوٹ بھی شامل تھا، جس میں کہا گیا کہ ’ایک رکن‘ نے غزہ پٹی اور بحیرہ احمر اور باب المندب آبنائے کی سکیورٹی سے متعلق بعض حصوں پر تحفظات ظاہر کیے۔

برکس گروپ میں برازیل، روس، بھارت، چین، جنوبی افریقہ، ایتھوپیا، مصر، ایران، متحدہ عرب امارات اور انڈونیشیا شامل ہیں۔

رکن ممالک بالخصوص ایران اور متحدہ عرب امارات کے درمیان اختلافات خاص طور پر ایران جنگ کے دوران زیادہ نمایاں ہوئے ہیں۔

جمعرات کو ایرانی وزیر خارجہ عباس عراقچی نے برکس ممالک پر زور دیا تھا کہ وہ امریکہ اور اسرائیل کی جانب سے، ان کے بقول، ’’غیر قانونی جارحیت‘‘ کی مذمت کریں۔ انہوں نے رکن ممالک سے یہ بھی کہا تھا کہ وہ بین الاقوامی اداروں کے سیاسی طور پر استعمال کیے جانے کی مخالفت کریں۔