بلوچستان میں 700 دہشت گرد ہلاک، 78 ہزار خفیہ آپریشن کیے گئے، سیکریٹری داخلہ

کوئٹہ (ڈیلی اردو) پاکستان کے شورش زدہ صوبے بلوچستان کے ضلع خاران میں سیکیورٹی اداروں نے خفیہ اطلاعات کی بنیاد پر کامیاب آپریشن کرتے ہوئے تین دہشت گردوں کو گرفتار کر لیا ہے، جو ایس ایچ او سٹی خاران قاسم  کے ہلاکت میں ملوث تھے۔

ایڈیشنل سیکریٹری داخلہ بلوچستان حمزہ شفقات نے ڈی آئی جی سی ٹی ڈی بلوچستان کے ہمراہ کوئٹہ میں نیوز کانفرنس کرتے ہوئے بتایا کہ گرفتار دہشت گردوں کو عدالت میں پیش کیا جائے گا۔ 

ان کا کہنا تھا کہ ایس ایچ او سٹی خاران دہشت گردوں کے خلاف کارروائی کر رہے تھے، جس کے باعث انہیں نشانہ بنایا گیا۔

ایڈیشنل چیف سیکریٹری داخلہ نے بتایا کہ صوبے بھر میں قیامِ امن کے لیے مؤثر اقدامات کیے جا رہے ہیں، اب تک بلوچستان میں 700 دہشت گرد ہلاک کیے جا چکے ہیں جبکہ 78 ہزار سے زائد خفیہ اطلاعات پر آپریشن کیے گئے ہیں۔

انہوں نے کہا کہ خاران میں آج ہونے والا آپریشن بھی اسی سلسلے کی کڑی ہے جس میں تین دہشت گرد گرفتار کیے گئے۔

ان کا کہنا تھا کہ ایف سی ہیڈکوارٹرز پر حملے کا تانے بانے بھی افغانستان سے ملتے ہیں، ایک گرفتار دہشتگرد نے بتایا تھا کہ وہ افغانستان سے ٹریننگ لے کر آیا ہے، دہشتگرد پولیس افسر کو اغوا کر کے اس پر ٹارچر کرنا چاہتے تھے، ڈی آئی جی کمپلیکس حملے میں دہشتگرد 2 کلانشکوف لے کر گئے تھے وہ بھی برآمد کر لی۔

پریس کانفرنس میں گرفتار دہشتگرد کا اعترافی بیان بھی چلایا گیا جس میں ملزم کا کہنا تھا کہ ہمیں حکم دیا گیا کہ ایس ایچ او کو اغو ا کرنا ہے، ان کو اغوا کرنے سے پہلے معلومات حاصل کیں، جب اغوا کرنے کی کوشش کی تو انہوں نے مزاحمت کی تھی۔