بلوچستان میں دو الگ کارروائیاں، ژوب اور جیوانی میں 38 دہشتگرد ہلاک ہونے کا دعویٰ

کوئٹہ(ڈیلی اردو) شورش زدہ صوبہ بلوچستان کے ضلع ژوب اور گوادر کے علاقے جیوانی میں 11 اکتوبر کو سیکیورٹی فورسز اور پاکستان کوسٹ گارڈز کی دو الگ کارروائیوں کے دوران مجموعی طور پر 38 دہشتگردوں کی ہلاکت کی اطلاع دی گئی ہے۔ فراہم کردہ تفصیلات کے مطابق ژوب میں آپریشن ردالفتنہ 3 کے دوران 10 دہشتگرد ہلاک ہوئے، جبکہ جیوانی میں کوسٹ گارڈز کی کارروائی میں مزید 28 دہشتگردوں کی ہلاکت کا دعویٰ کیا گیا ہے۔

اطلاعات کے مطابق ژوب میں سیکیورٹی فورسز نے خفیہ معلومات کی بنیاد پر دہشتگردوں کی موجودگی کے خلاف کارروائی کی۔ آپریشن میں کواڈ کاپٹر ٹیکنالوجی اور زمینی دستوں کی مدد حاصل کی گئی، جس کے نتیجے میں 10 دہشتگرد ہلاک ہوئے۔

دوسری کارروائی ضلع گوادر کے علاقے جیوانی میں پیش آئی، جہاں پاکستان کوسٹ گارڈز کے اہلکار اسمگلنگ کی روک تھام کے لیے گشت کررہے تھے۔ فراہم کردہ معلومات کے مطابق اہلکاروں کو مبینہ طور پر فائرنگ کا سامنا کرنا پڑا، جس کے بعد جوابی کارروائی میں فتنۃ الہندوستان سے وابستہ قرار دیے گئے 28 دہشتگرد ہلاک ہوگئے۔

دونوں واقعات میں ہلاک ہونے والوں کی شناخت اور دیگر تفصیلات تاحال سامنے نہیں آئیں، جبکہ ہلاکتوں کی تعداد اور واقعات سے متعلق دعوؤں کی آزادانہ تصدیق بھی دستیاب نہیں۔ حکام کی جانب سے مزید تفصیلات سامنے آنے پر کارروائیوں کے بارے میں صورت حال واضح ہوسکے گی۔