بلوچستان میں دو پولیس افسران کا بھائی نامعلوم افراد کے ہاتھوں قتل

کوئٹہ (ڈیلی اردو) صوبہ بلوچستان کے ضلع کیچ کے علاقے تربت میں دو پولیس افسران کے ایک بھائی کو فائرنگ کرکے قتل کردیا گیا۔

رپورٹس کے مطابق پولیس کا کہنا تھا کہ حافظ عبدالکریم پر سیٹلائٹ ٹاؤن کے علاقے میں اس وقت حملہ ہوا جب وہ تربت میں ’یوم یکجہتی کشمیر‘ کی ایک تقریب میں شرکت کے بعد گھر جارہے تھے۔

پولیس نے بتایا کہ حملہ آور موقع سے فرار ہونے میں کامیاب ہوگئے۔

حملہ آوروں کی فائرنگ سے متاثرہ فرد شدید زخم آئے اور وہ موقع پر ہی دم توڑ گیا۔

علاوہ ازیں پولیس نے جائے وقوع پر پہنچ کر لاش کو پوسٹ مارٹم کے لیے ضلعی ہستپال منتقل کردیا۔

جس کے بعد طبی و قانونی کارروائی کے بعد لاش کو اہل خانہ کے حوالے کردیا گیا۔

واضح رہے کہ متوفی کے بڑے بھائیوں میں سے ایک خالد دشتی ایس ایچ او پسنی ہیں جبکہ دوسرے بھائی حسین دشتی اسپیشل برانچ میں سب انسپکٹر ہیں۔

پولیس کی جانب سے مقدمہ درج کرکے تحقیقات کا آغاز کردیا گیا ہے، تاہم ابھی تک کسی کے قتل کی ذمہ داری قبول نہیں کی۔