بلوچستان میں سکیورٹی فورسز کی کارروائیاں، 48 گھنٹوں میں 10 دہشتگرد ہلاک

کوئٹہ(ڈیلی اردو) شورش زدہ صوبہ بلوچستان کے علاقوں پنجگور اور پروم میں سکیورٹی فورسز نے انٹیلی جنس معلومات کی بنیاد پر مسلسل کارروائیاں کرتے ہوئے 10 دہشتگردوں کو ہلاک کردیا جبکہ بڑی مقدار میں اسلحہ اور دہشتگردی میں استعمال ہونے والا دیگر سامان بھی برآمد کرلیا گیا۔

سکیورٹی ذرائع کے مطابق یہ کارروائیاں جاری آپریشن ’ردالفساد سوم‘ کے تحت گزشتہ 48 گھنٹوں کے دوران کی گئیں۔ کارروائیوں میں دہشتگردوں کے ٹھکانوں اور نیٹ ورک کو نشانہ بنایا گیا، جس کے نتیجے میں متعدد دہشتگردوں کو ہلاک کرکے ان کی کارروائیوں کے لیے استعمال ہونے والا اسلحہ اور دیگر سامان قبضے میں لے لیا گیا۔

سکیورٹی فورسز کے مطابق انٹیلی جنس معلومات پر مبنی کارروائیوں کا مقصد دہشتگردوں کے نیٹ ورک، ان کے سہولت کاروں اور آپریشنل ڈھانچے کو توڑنا ہے۔ حکام کا کہنا ہے کہ مسلسل کارروائیوں کے باعث دہشتگرد عناصر کی نقل و حرکت اور حملوں کی منصوبہ بندی کی صلاحیت محدود ہو رہی ہے۔

حکام کے مطابق دہشتگردوں کی جانب سے سکیورٹی فورسز کا براہ راست مقابلہ کرنے کے بجائے نرم اہداف کو نشانہ بنانے کی کوششیں بھی کی جارہی ہیں، تاہم سکیورٹی ادارے ایسے خطرات سے نمٹنے کے لیے بلوچستان کے مختلف علاقوں میں نگرانی اور انٹیلی جنس کارروائیاں مزید مؤثر بنا رہے ہیں۔

سکیورٹی فورسز نے واضح کیا ہے کہ دہشتگردوں، ان کے سہولت کاروں اور معاون نیٹ ورکس کے خلاف کارروائیاں بلا تاخیر جاری رہیں گی، جبکہ شہریوں کے جان و مال کے تحفظ اور علاقے میں امن و استحکام یقینی بنانے کے لیے سکیورٹی اقدامات مزید سخت کیے جارہے ہیں۔