بلوچستان میں سکیورٹی فورسز کی کارروائیاں، 96 گھنٹوں میں 71 سے زائد دہشتگرد ہلاک: آئی ایس پی آر

راولپنڈی(ڈیلی اردو) شورش زدہ صوبہ بلوچستان کے مختلف علاقوں میں سکیورٹی فورسز کی کارروائیوں کے دوران گزشتہ 96 گھنٹوں میں 71 سے زائد دہشتگرد ہلاک کیے گئے ہیں۔ پاک فوج کے شعبہ تعلقات عامہ (آئی ایس پی آر) کے مطابق کارروائیوں کے دوران متعدد مشتبہ ٹھکانے کلیئر کیے گئے جبکہ اسلحہ، گولہ بارود اور دھماکا خیز مواد بھی برآمد ہوا۔

آئی ایس پی آر کے مطابق انٹیلیجنس معلومات کی بنیاد پر 21 ستمبر کو زیارت اور گردونواح میں کارروائی شروع کی گئی، جبکہ شعبان کے علاقے میں بھی دہشتگردوں کے متعدد ٹھکانوں کے خلاف آپریشن کیا گیا۔ بیان کے مطابق فائرنگ کے تبادلے کے دوران 33 دہشتگرد ہلاک ہوئے اور ان کے قبضے سے بڑی مقدار میں اسلحہ و گولہ بارود برآمد کیا گیا۔

فوج کے شعبہ تعلقات عامہ کا کہنا ہے کہ گزشتہ 72 گھنٹوں کے دوران کارروائیوں میں مزید تیزی لائی گئی، جس کے نتیجے میں مزید 23 دہشتگرد ہلاک ہوئے۔ سکیورٹی فورسز نے علاقے کے ایک بڑے حصے کو کلیئر کرلیا ہے، جبکہ خطرے کے مکمل خاتمے تک کلیئرنس آپریشن جاری رکھنے کا کہا گیا ہے۔

آئی ایس پی آر کے مطابق 25 ستمبر کو ضلع نوشکی میں بھی انٹیلیجنس بنیادوں پر کارروائی کی گئی، جس میں ایک مبینہ دہشتگرد ٹھکانے کو نشانہ بنا کر 11 دہشتگرد ہلاک کیے گئے۔ اسی طرح مند کے علاقے میں کارروائی کے دوران مزید 6 دہشتگرد ہلاک اور بڑی تعداد میں اسلحہ و گولہ بارود برآمد کرنے کا دعویٰ کیا گیا ہے۔

آئی ایس پی آر نے اپنے بیان میں بلوچستان میں سرگرم بعض دہشتگرد گروہوں کو بھارتی حمایت یافتہ قرار دیتے ہوئے کہا ہے کہ پاکستان میں دہشتگردی کی سرگرمیوں میں افغان طالبان حکومت کے مبینہ کردار سے امن و استحکام کو خطرہ لاحق ہے۔ یہ الزامات فوج کے بیان کا حصہ ہیں، جبکہ آزاد ذرائع سے ان تمام دعوؤں کی مکمل آزادانہ تصدیق سامنے نہیں آئی۔

پاک فوج کے شعبہ تعلقات عامہ کے مطابق بلوچستان میں جاری کارروائیاں قومی ایکشن پلان کی وفاقی ایپکس کمیٹی سے منظور شدہ ’’عزمِ استحکام‘‘ کے وژن کے تحت جاری رہیں گی اور سکیورٹی فورسز و قانون نافذ کرنے والے ادارے دہشتگردی کے خاتمے کے لیے کارروائیاں جاری رکھیں گے۔