بلوچستان: ڈیرہ بگٹی میں سکیورٹی فورسز کا آپریشن، پانچ شدت پسند ہلاک

راولپنڈی (ڈیلی اردو ) پاکستان کے شورش زدہ صوبہ بلوچستان کے ضلع ڈیرہ بگٹی میں سیکورٹی فورسز کے آپریشن میں پانچ شدت پسند ہلاک ہوگئے 

پاکستانی فوج کی شعبے تعلقاتِ عامہ کی جانب سے جاری ہونے والے ایک بیان میں کہا گیا ہے کہ پانچ دسمبر کو سکیورٹی فورسز نے ضلع ڈیرہ بگٹی میں شدت پسندوں کی موجودگی کی اطلاع پر ایک خفیہ آپریشن کیا۔

بیان میں اس آپریشن کے حوالے سے مزید کہا گیا ہے کہ ’آپریشن کے دوران فورسز نے شدت پسندوں کے ٹھکانے کو مؤثر طریقے سے نشانہ بنایا اور شدید فائرنگ کے تبادلے کے بعد پانچ شدت پسند مارے گئے۔‘

آئی ایس پی آر کی جانب سے کہا گیا ہے کہ ’اس کارروائی کے دوران شدت پسندوں کے قبضے سے اسلحہ، گولہ بارود اور دھماکہ خیز مواد بھی برآمد ہوا۔ تاہم یہ عناصر علاقے میں متعدد دہشت گردانہ سرگرمیوں میں ملوث تھے۔‘

بیان میں مزید کہا گیا ہے کہ ’علاقے سے شدت پسندوں کے خاتمے کے لیے کلیئرنس آپریشن جاری ہے، جبکہ سکیورٹی فورسز اور پاکستان کی قانون نافذ کرنے والی ایجنسیاں نیشنل ایکشن پلان کی فیڈرل ایپکس کمیٹی کی منظور شدہ وژن ’عزمِ استحکام‘ کے تحت انسدادِ دہشت گردی کی مہم بھرپور انداز میں جاری رکھیں گی تاکہ ملک سے بیرونی سرپرستی اور امداد یافتہ دہشت گردی کا مکمل خاتمہ کیا جا سکے۔‘