بلوچستان: کوہلو میں سیکیورٹی فورسز کی گاڑی کے قریب دھماکا، میجر اور کیپٹن ہلاک، 3 فوجی زخمی

راولپنڈی + کوئٹہ (ڈیلی اردو) صوبہ بلوچستان کے ضلع کوہلو میں سیکیورٹی فورسز کی گاڑی کے قریب دیسی ساختہ بم کا دھماکا ہوا، جس کے نتیجے میں 2 افسران ہلاک ہوگئے۔

پاکستانی فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا کہ ’قابل اعتبار خفیہ اطلاع پر بلوچستان کے علاقے کوہلو میں 10 فروری کو کارروائی شروع کی گئی تھی تاکہ دہشت گردوں کو آزادانہ کارروائیوں سے روکا جائے‘۔

بیان میں کہا گیا کہ علاقے میں کارروائی کے دوران دیسی ساختہ بم کا دھماکا ہوا اور کارروائی کرنے والی پارٹی کے قریب دھماکے کے نتیجے میں دو افسران ہلاک ہوگئے۔

آئی ایس پی آر نے بتایا کہ دھماکے کے نتیجے میں ’میجر جواد اور کیپٹن صغیر نے مادر وطن کے دفاع کے لیے اپنی جانوں کا نذرانہ پیش کیا‘۔

بیان میں کہا گیا کہ علاقے میں دہشت گردوں کے خلاف کارروائی جاری ہے تاکہ امن کے دشمنوں کو قابو کیا جائے۔

واقعے کے حوالے سے مزید کہا گیا کہ دشمن عناصر کی جانب سے اس طرح کے بزدلانہ اقدامات بلوچستان میں بڑی محنت سے حاصل کیا گیا امن اور استحکام سبوتاژ نہیں کرسکتے۔

آئی ایس پی آر نے کہا کہ سیکیورٹی فورسز اس طرح کے اقدامات اپنے خون اور جان کی قیمت پر ناکام بنانے کے لیے پرعزم ہیں۔

اس سے قبل لیویز اہلکار جمال شاہ نے بتایا تھا کہ کوہلو کے وسطی علاقے تڑیمڑ میں سیکیورٹی فورسز کی گاڑی معمول کی گشت پر تھی کہ سڑک کنارے نصب بم کا دھماکا ہوا۔

انہوں نے مزید بتایا تھا کہ دھماکے میں 2 سیکیورٹی اہلکار ہلاک جبکہ 3 زخمی ہو گئے، جنہیں کوہلو کے ڈسٹرکٹ ہیڈکوارٹرز (ڈی ایچ کیو) ہسپتال منتقل کر دیا گیا۔

ایم ایس ڈی ایچ کیو کوہلو ڈاکٹر اصغر مری نے ہسپتال میں ایمرجنسی نافذ کرتے ہوئے تمام طبی عملے، ڈاکٹرز اور پیرامیڈیکس کو الرٹ کردیا تھا۔

دوسری جانب حملے کی ذمہ داری کالعدم بلوچ لبریشن آرمی نے قبول کرلی، ترجمان بی ایل اے آزاد بلوچ نے دعوی کیا ہے کہ حملے میں کیپٹن اور میجر سمیت 9 اہلکار ہلاک ہوئے۔

واضح رہے کہ 4 فروری کو بلوچستان کے ضلع گوادر کے علاقے جیوانی میں بارودی سرنگ کے دھماکے اور اس کے بعد مسلح عسکریت پسندوں کی جانب سے گھات لگا کر کیے گئے حملے میں ایک فوجی ہلاک اور 7 زخمی ہوگئے تھے۔

حکام کے مطابق کوسٹ گارڈز اہلکار اپنی گاڑی میں جا رہے تھے کہ اس دوران ان کی گاڑی بارودی سرنگ سے ٹکرا گئی تھی۔