بلوچستان: کوہلو میں فوجی قافلے پر حملہ، کیپٹن سمیت 5 اہلکار ہلاک

راولپنڈی + کوئٹہ (ڈیلی اردو/بی بی سی) صوبہ بلوچستان کے علاقے کاہان میں ایک فوجی قافلے پر حملے میں پانچ فوجی ہلاک ہو گئے ہیں۔

قاہان ضلع کوہلو میں واقع ہے اور یہ حملہ بلوچستان میں 72 گھنٹوں میں فوج پر دوسرا حملہ ہے۔ اس سے قبل کیچ میں ایک حملے میں چار فوجی ہلاک ہو گئے تھے۔

آج ہونے والے حملے میں کیپٹن فہد، لانس نائیک امتیاز، سپاہی اصغر، سپاہی مہران، اور سپاہی شمعون ہلاک ہو گئے ہیں۔

واضح رہے کہ آئی ایس پی آر کے مطابق 24 دسمبر سے انٹیلیجنس بنیادوں پر ایک کلیئرنس آپریشن جاری ہے۔

اس واقعے کی ذمہ دار بلوچستان لبریشن آرمی نے قبول کرتے ہوئے فوجی کپتان سمیت آٹھ فوجیوں کی ہلاکت اور تین کے زخمی ہونے کا دعویٰ کیا ہے تاہم پاکستانی فوج کی جانب سے پانچ افراد کی ہلاکت کی تصدیق کی گئی ہے۔

وفاقی وزیرِ داخلہ رانا ثنااللہ خان، سابق صدر آصف علی زرداری اور چیئرمین سینیٹ صادق سنجرانی سمیت مختلف شخصیات نے اس واقعے کی مذمت کی ہے۔