سعودی عرب کی جانب داغے گئے تین حوثی میزائل تباہ کرنے کا دعویٰ، مشرقی علاقے میں ڈرون بھی مار گرایا گیا

ریاض (ڈیلی اردو) یمن کے ایران نواز حوثی باغیوں کی جانب سے سعودی عرب کو نشانہ بنانے کی مبینہ کوشش ناکام بنانے کا دعویٰ سامنے آیا ہے، سعودی قیادت میں قائم اتحاد کے مطابق فضائی دفاعی نظام نے دارالحکومت ریاض کی طرف داغے گئے ایک بیلسٹک اور ایک کروز میزائل سمیت جنوبی سعودی عرب کی جانب آنے والا ایک اور بیلسٹک میزائل فضا میں ہی تباہ کر دیا۔

اتحاد کے ترجمان میجر جنرل ترکی المالکی نے سوشل میڈیا پلیٹ فارم ایکس پر جاری بیان میں بتایا کہ فضائی دفاعی نظام نے ریاض کی سمت آنے والے دونوں میزائلوں کو روک لیا، جبکہ جنوبی علاقے کی جانب داغے گئے بیلسٹک میزائل کو بھی ہدف تک پہنچنے سے پہلے تباہ کر دیا گیا۔ ان کے مطابق سعودی عرب کے مشرقی علاقے میں ایک ڈرون بھی مار گرایا گیا۔

خبر رساں ادارے روئٹرز کے مطابق سعودی شہری دفاع نے میزائلوں کو روکنے کے اعلان سے قبل ریاض کے لیے ہنگامی انتباہ جاری کیا تھا، تاہم بعد ازاں حکام نے بتایا کہ دارالحکومت کو درپیش خطرہ ٹل گیا ہے۔ جنوبی سعودی عرب کے شہروں ابہا اور خمیس مشیط میں بھی ممکنہ خطرے کے پیش نظر شہریوں کو خبردار کیا گیا، جسے بعد میں واپس لے لیا گیا۔

عالمی میڈیا رپورٹس کے مطابق سعودی عرب اور حوثی باغیوں کے درمیان حالیہ ہفتوں میں کشیدگی میں اضافہ ہوا ہے۔ یمن کے حوثی باغیوں نے سعودی عرب کے ہوائی اڈوں، بندرگاہوں اور توانائی کے بنیادی ڈھانچے کو نشانہ بنانے کی کارروائیاں تیز کر دی ہیں، جبکہ سعودی عرب کی جانب سے بھی یمن میں حوثی اہداف پر فضائی حملے کیے گئے ہیں۔

روئٹرز کے مطابق ستمبر میں حوثی باغیوں کی پیش قدمی باب المندب کے قریب تک پہنچنے کے بعد خطے میں کشیدگی مزید بڑھ گئی ہے۔ باب المندب بحیرہ احمر کے جنوبی داخلی راستے پر واقع ایک اہم بحری گزرگاہ ہے، جہاں کسی بھی فوجی کشیدگی سے عالمی تجارت اور بحری آمدورفت متاثر ہونے کا خدشہ پیدا ہو سکتا ہے۔

تاحال سعودی اتحاد کے بیان میں میزائلوں اور ڈرون کو تباہ کرنے کے واقعات میں جانی نقصان یا املاک کو پہنچنے والے کسی نقصان کی تفصیلات جاری نہیں کی گئیں، جبکہ حوثی باغیوں کی جانب سے بھی اس تازہ کارروائی پر فوری ردعمل سامنے نہیں آیا۔