بنوں حملے میں زخمی ہونے والے میجر عدنان اسلم دم توڑ گئے، راولپنڈی میں نمازِ جنازہ ادا

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع بنوں میں وفاقی نیم فوجی دستے فیڈرل کانسٹیبلری (ایف سی) ہیڈکوارٹر پر 2 ستمبر کو ہونے والے دہشت گردانہ حملے میں زخمی ہونے والے اسپیشل سروسز گروپ (ایس ایس جی) کے افسر میجر عدنان اسلم چھ روز زندگی اور موت کی کشمکش میں رہنے کے بعد دم توڑ گئے۔

ڈیلی اردو کو سیکورٹی ذرائع نے بتایا کہ میجر عدنان نے کارروائی کے دوران بہادری کا مظاہرہ کرتے ہوئے اپنے زخمی ساتھی کو جسم سے ڈھانپ کر بچایا اور دو حملہ آوروں کو ہلاک کیا، تاہم وہ خود چار گولیوں کا نشانہ بنے۔ شدید زخمی حالت میں انہیں سی ایم ایچ راولپنڈی منتقل کیا گیا تھا جہاں وہ جانبر نہ ہو سکے۔

پاکستانی فوج کے شعبہ تعلقات عامہ (آئی ایس پی آر) کے مطابق میجر عدنان اسلم کی نمازِ جنازہ چکلالہ گیریژن، راولپنڈی میں ادا کی گئی جس میں وزیرِاعظم شہباز شریف، پاکستان فوج کے فیلڈ مارشل سید عاصم منیر، وفاقی وزرا، اعلیٰ فوجی و سول افسران اور اہلخانہ نے شرکت کی۔ بعد ازاں میجر عدنان کو ان کے آبائی علاقے میں فوجی اعزاز کے ساتھ سپردِ خاک کیا گیا۔

وزیرِاعظم نے میجر عدنان کی جرات کو خراجِ تحسین پیش کرتے ہوئے کہا: ’’آج ہم نے ایک بہادر سپوت کو کھو دیا ہے، ان کی قربانی ہمیشہ یاد رکھی جائے گی۔‘‘

آئی ایس پی آر کے مطابق میجر عدنان کی قربانی اس بات کی گواہی ہے کہ پاک فوج دہشت گردی کے مکمل خاتمے کے مشن پر ثابت قدم ہے۔

خیال رہے کہ 2 ستمبر کو بنوں میں ہونے والے خودکش حملے کے بعد مسلح شدت پسندوں نے ایف سی لائنز پر دھاوا بولا تھا۔ اس حملے میں 6 اہلکار ہلاک، 16 زخمی جبکہ 3 عام شہری بھی متاثر ہوئے تھے۔ جوابی کارروائی میں خودکش بمبار سمیت 6 شدت پسند مارے گئے تھے۔ اس حملے کی ذمہ داری شدت پسند تنظیم اتحاد المجاہدین پاکستان نے قبول کی تھی۔