بنوں میں آپریشن، 2 شدت پسند ہلاک، 19 گرفتار، پولیس تھانے پر ڈرون حملہ

بنوں (ڈیلی اردو رپورٹ) خیبر پختونخوا کے ضلع بنوں میں پاکستانی سیکیورٹی فورسز اور پولیس نے مشترکہ آپریشن کرتے ہوئے کالعدم تحریک طالبان پاکستان (ٹی ٹی پی) سے تعلق رکھنے والے شدت پسندوں کے خلاف کارروائی کی ہے، جس میں دو حملہ آور مارے گئے جبکہ دو کو زندہ گرفتار کر لیا گیا ہے۔

پولیس ذرائع کے مطابق 17 مزید مشتبہ افراد کو حراست میں لے کر تفتیش کا آغاز کر دیا گیا ہے۔

حکام کا کہنا ہے کہ آپریشن کے دوران متعدد گھروں اور مشتبہ ٹھکانوں کو مسمار کیا گیا، جبکہ فضائی نگرانی اور اینٹی ڈرون ٹیکنالوجی کا استعمال بھی کیا گیا۔

آپریشن کے دوران ایک بارود سے بھرا کواڈ کاپٹر ڈرون میریاں پولیس اسٹیشن پر آ گرا، جس کے نتیجے میں 7 پولیس اور سیکیورٹی اہلکار زخمی ہوئے۔ حکام نے تصدیق کی ہے کہ تمام زخمیوں کی حالت خطرے سے باہر ہے۔

ابتدائی تفتیش کے مطابق یہ ڈرون حملہ کالعدم ٹی ٹی پی کی جانب سے کیا گیا۔ ریجنل پولیس آفیسر بنوں، سجاد خان، زخمی اہلکاروں کی عیادت کے لیے اسپتال پہنچے۔