بنوں میں امن کمیٹی عمائدین پر ڈرون حملہ، 5 افراد زخمی

بنوں (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع بنوں میں امن کمیٹی کے عمائدین پر مبینہ ڈرون حملے کے نتیجے میں 5 افراد زخمی ہوگئے۔

سرکاری ذرائع کے مطابق حملہ بنوں کے سب ڈویژن وزیر کے علاقے برغنتو میں پیش آیا، جہاں احمد زئی امن کمیٹی کے عمائدین کو مبینہ طور پر دہشت گردوں نے کواڈ کاپٹر ڈرون کے ذریعے نشانہ بنایا۔

ذرائع کا کہنا ہے کہ حملے کے نتیجے میں 5 افراد زخمی ہوئے، جنہیں فوری طور پر طبی امداد کے لیے اسپتال منتقل کر دیا گیا ہے۔

مقامی ذرائع کے مطابق کواڈ کاپٹر کے ذریعے کیا گیا حملہ امن کمیٹی کے ارکان کو نشانہ بنا کر کیا گیا۔ تاہم حملے کی نوعیت اور اس میں استعمال ہونے والے ڈرون سے متعلق مزید تفصیلات سامنے نہیں آسکیں۔

واقعے کے بعد سیکیورٹی اداروں نے علاقے میں صورتحال کا جائزہ لینا شروع کر دیا ہے، جبکہ حملے میں ملوث عناصر کی تلاش کے لیے اقدامات جاری ہیں۔

واضح رہے کہ خیبر پختونخوا کے جنوبی اضلاع میں امن کمیٹیوں اور سیکیورٹی فورسز سے وابستہ افراد کو ماضی میں بھی دہشت گرد حملوں کا سامنا رہا ہے۔