بنوں میں ریٹائرڈ صوبیدار ہلاک، تین نمازی زخمی، پولیس چوکی پر حملہ ناکام

بنوں (نمائندہ  ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں دہشتگردی کے دو مختلف واقعات پیش آئے جن میں ایک ریٹائرڈ فوجی اہلکار ہلاک اور تین نمازی زخمی ہوگئے جبکہ پولیس چوکی پر حملہ ناکام بنا دیا گیا۔

پہلا واقعہ نورڑ کے علاقے ملاگان میں پیش آیا جہاں دہشتگردوں نے ریٹائرڈ صوبیدار عطاء اللہ کو اغواء کرنے کی کوشش کی۔ مزاحمت پر دہشتگردوں نے فائرنگ کر دی جس کے نتیجے میں عطاء اللہ موقع پر ہی ہلاک ہوگئے۔ فائرنگ کے دوران مسجد میں موجود تین نمازی عابد، میر قد ایاز اور ایک نامعلوم شخص بھی زخمی ہوگئے جنہیں ڈسٹرکٹ ہیڈکوارٹر ہسپتال منتقل کردیا گیا۔

دوسرا واقعہ رات گئے پولیس چوکی فتح خیل پر پیش آیا جہاں دہشتگردوں نے بھاری اسلحہ سے حملہ کیا۔ پولیس کی بروقت اور بھرپور جوابی کارروائی کے نتیجے میں دہشتگرد فرار ہوگئے۔ 

ڈی پی او بنوں کے مطابق حملے میں کسی قسم کا جانی نقصان نہیں ہوا۔

پولیس کے مطابق علاقے میں سرچ آپریشن جاری ہے جبکہ پولیس اہلکاروں کے حوصلے بلند ہیں اور وہ ہر چیلنج کا مقابلہ کرنے کے لئے تیار ہیں۔ حکام کے مطابق اس چوکی پر ماضی میں بھی متعدد بار حملے ہوچکے ہیں۔