بنوں میں سی ٹی ڈی کا آپریشن، ٹی ٹی پی کے 2 انتہائی مطلوب دہشت گرد ہلاک

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں ‏کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاع کی بنیاد پر کی گئی کارروائی کے دوران فائرنگ کے تبادلے میں کالعدم تحریک طالبان پاکستان کے 2 انتہائی مطلوب دہشت گرد ہلاک کر دیے۔

سی ٹی ڈی کے مطابق ضلع بنوں کے تھانہ ڈومیل کی حدود میں کمپنی روڈ پر دہشت گرد ایک بڑی کارروائی کی منصوبہ بندی کر رہے تھے، جس پر سی ٹی ڈی کی خصوصی ٹیم نے ضلعی پولیس کے ہمراہ علاقے کا گھیراؤ کیا۔ دہشت گردوں نے فرار کی کوشش کی اور اندھا دھند فائرنگ شروع کر دی، جس کے جواب میں سی ٹی ڈی اور پولیس نے بھرپور کارروائی کی۔ فائرنگ کا تبادلہ تقریباً 25 منٹ تک جاری رہا۔

آپریشن کے بعد علاقے میں سرچ اینڈ کلیئرنس کیا گیا، جس میں ہلاک دہشت گردوں کی شناخت راشدین عرف ملنگ یار اور خالد عثمان عرف عثمان کے طور پر ہوئی۔ دونوں بنوں کے رہائشی تھے۔ راشدین 30 اپریل 2025 کو سی ٹی ڈی پر ہونے والے حملے کا ماسٹر مائنڈ تھا، جس میں 4 اہلکار ہلاک ہوئے، جبکہ خالد عثمان متعدد حملوں اور ٹارگٹ کلنگ میں ملوث تھا۔

ہلاک دہشت گردوں کے قبضے سے 2 کلاشنکوف، 6 میگزین، 23 راؤنڈز، 2 دستی بم، 2 موبائل فونز اور کالعدم ٹی ٹی پی کے دو ٹی ٹی پی کارڈز برآمد ہوئے۔ فرار ہونے والے دہشت گردوں کی گرفتاری کے لیے پولیس اور سی ٹی ڈی نے علاقے میں اضافی نفری کے ساتھ سرچ آپریشن جاری رکھا ہوا ہے۔