بنوں میں فائرنگ کے دو مختلف واقعات میں انٹیلیجنس افسر اور ریٹائرڈ پولیس اہلکار ہلاک

واشنگٹن (ش ح ط) خیبر پختونخوا کے ضلع بنوں میں فائرنگ کے دو مختلف واقعات میں انٹیلیجنس بیورو (آئی بی) کے ایک سب انسپکٹر اور ایک ریٹائرڈ پولیس اہلکار ہلاک جبکہ ایک شخص زخمی ہو گیا۔

پہلا واقعہ ہوید روڈ پر پیش آیا جہاں موٹر سائیکل سوار دو مسلح دہشت گردوں نے انٹیلیجنس بیورو کے سب انسپکٹر سلطان نیاز پر فائرنگ کر دی۔ فائرنگ کے نتیجے میں سلطان نیاز موقع پر ہلاک جبکہ ان کا بھائی شہاب زخمی ہو گیا۔ حملہ آور واردات کے بعد فرار ہونے میں کامیاب ہو گئے۔ پولیس نے علاقے کو گھیرے میں لے کر تحقیقات شروع کر دی ہیں۔

دوسرا واقعہ بنوں کے علاقے گاؤں ممش خیل میں پیش آیا جہاں شدت پسندوں نے فائرنگ کرکے ریٹائرڈ پولیس اہلکار میاں حبیب اللہ شاہ کو ہلاک کر دیا۔ پولیس کے مطابق حملے کے بعد دہشت گرد فرار ہو گئے جن کی تلاش جاری ہے۔

پولیس حکام کا کہنا ہے کہ دونوں واقعات کی نوعیت اور ممکنہ تعلقات کے پہلوؤں پر تحقیقات کی جا رہی ہیں۔