بنوں میں پولیس چوکی پر حملہ، ایک اہلکار ہلاک، تین زخمی، تین دہشتگرد بھی ہلاک

بنوں (ڈیلی اردو) خیبرپختونخوا کے ضلع بنوں میں فتح خیل کے مقام پر پولیس چوکی پر دہشتگردوں نے رات گئے حملہ کر دیا، جس کے نتیجے میں ایک پولیس اہلکار ہلاک اور تین زخمی ہو گئے۔ پولیس کی بروقت اور مؤثر جوابی کارروائی میں تین دہشتگرد مارے گئے، جبکہ متعدد فرار ہو گئے۔

تفصیلات کے مطابق دہشتگردوں کی بڑی تعداد، جن کی تعداد 40 سے 50 کے درمیان بتائی جا رہی ہے، نے بھاری ہتھیاروں سے پولیس چوکی کو نشانہ بنایا۔ پولیس اہلکاروں نے حملے کا بھرپور جواب دیتے ہوئے دہشتگردوں کی پیش قدمی روک دی۔

ہلاک ہونے والے اہلکار کی شناخت کانسٹیبل نیاز کے طور پر ہوئی ہے، جبکہ زخمی اہلکاروں میں منیر، سوداد اور مفتی محمود شامل ہیں، جنہیں فوری طور پر طبی امداد کے لیے اسپتال منتقل کیا گیا۔

ڈی آئی جی بنوں کا کہنا ہے کہ پولیس نے جانفشانی سے دہشتگردوں کا مقابلہ کیا اور متعدد حملہ آوروں کو مار گرایا۔ ان کے مطابق پولیس فورس دہشتگردی کے خلاف صف اول میں کھڑی ہے اور ایسی بزدلانہ کارروائیاں ہمارے حوصلے پست نہیں کر سکتیں۔

ادھر وفاقی وزیر داخلہ محسن نقوی نے فتح خیل چوکی پر ہونے والے دہشتگرد حملے کی شدید مذمت کرتے ہوئے پولیس اہلکار کی قربانی کو خراجِ تحسین پیش کیا۔ ان کا کہنا تھا کہ ریاست دشمن عناصر کی بزدلانہ کارروائیوں کا منہ توڑ جواب دیا جائے گا۔