بنوں میں پولیس کا خفیہ آپریشن، مبینہ طور پر 2 دہشتگرد ہلاک

بنوں(ڈیلی اردو) خیبرپختونخواہ کے شورش زدہ ضلع بنوں میں پولیس نے خفیہ اطلاع پر کارروائی کرتے ہوئے فائرنگ کے تبادلے میں مبینہ طور پر دو دہشتگردوں کو ہلاک کرنے کا دعویٰ کیا ہے۔

پولیس کے مطابق کارروائی ڈی پی او بنوں کیپٹن (ر) محمد فرقان بلال کی نگرانی میں لوڑہ غاڈہ اور گریڑہ شاہجہان کے علاقے میں کی گئی، جہاں دہشتگردوں کی موجودگی کی اطلاع موصول ہوئی تھی۔

آپریشن میں ایس ڈی پی او رورل ٹو عصمت اللہ خان، ایس ایچ او منڈان، ایس ایچ او سٹی، ایس ایچ او صدر، کوئیک رسپانس فورس (کیو آر ایف) اور بکتر بند گاڑیوں پر مشتمل ٹیموں نے حصہ لیا۔

پولیس کا کہنا ہے کہ کارروائی کے دوران اہلکاروں اور مبینہ دہشتگردوں کے درمیان تقریباً 25 منٹ تک فائرنگ کا تبادلہ جاری رہا، جس کے بعد پولیس کے مطابق دو دہشتگرد ہلاک ہوگئے۔

پولیس نے ہلاک افراد کی لاشیں تحویل میں لے کر ڈسٹرکٹ ہیڈکوارٹر اسپتال منتقل کردیں، جبکہ کارروائی مکمل ہونے کے بعد علاقے کو گھیرے میں لے کر مزید سرچ آپریشن بھی شروع کردیا گیا۔

پولیس کے مطابق ہلاک افراد کے قبضے سے ایک کلاشنکوف، ایک پستول اور ایک وائرلیس سیٹ برآمد ہوا ہے۔ دونوں افراد کی شناخت اور ان کے ممکنہ مجرمانہ ریکارڈ سے متعلق تحقیقات جاری ہیں۔

بنوں پولیس نے کہا ہے کہ ضلع میں امن و امان برقرار رکھنے اور شہریوں کے جان و مال کے تحفظ کیلئے دہشتگرد عناصر کے خلاف کارروائیاں جاری رکھی جائیں گی۔