بھارت کو سخت انتباہ: “کسی بھی مہم جوئی کا جواب ایٹمی ہتھیاروں سمیت دیا جائیگا” پاکستان

ماسکو (ڈیلی اردو) روس میں تعینات پاکستانی سفیر محمد خالد جمالی نے بھارت کی جانب سے کسی ممکنہ فوجی کارروائی کے جواب میں ایٹمی ہتھیاروں سمیت ہر ممکن قوت کے استعمال کا عندیہ دیا ہے۔ روسی میڈیا سے بات کرتے ہوئے انہوں نے کہا کہ پاکستان کے پاس خفیہ معلومات موجود ہیں، جن سے بھارت کی ممکنہ مہم جوئی کے واضح اشارے ملے ہیں۔

سفیر خالد جمالی کے مطابق، “اگر بھارت نے پاکستان پر حملہ کیا تو مخصوص اہداف کو نشانہ بنانے کا فیصلہ پہلے ہی کیا جا چکا ہے۔ ہمیں لگتا ہے کہ یہ حملہ قریب ہے اور اس کا خطرہ حقیقی ہے۔”

انہوں نے خبردار کیا کہ اگر بھارت دریاؤں کا پانی روکنے یا رخ موڑنے کی کوشش کرتا ہے تو پاکستان اسے بھی اعلان جنگ تصور کرے گا اور بھرپور جواب دے گا۔

بھارتی الزامات مسترد، عالمی تحقیقات کا مطالبہ

محمد خالد جمالی نے بھارت کی جانب سے پاکستان پر لگائے گئے الزامات کو “بے بنیاد” اور “جنگی پروپیگنڈہ” قرار دیتے ہوئے مسترد کر دیا۔ ان کا کہنا تھا کہ پاکستان اپنی سرحدوں کا دفاع کرنے کا پورا حق رکھتا ہے۔ انہوں نے عالمی برادری سے مطالبہ کیا کہ بھارتی زیر انتظام کشمیر کے علاقے پہلگام میں ہونے والے حملے کی غیر جانب دارانہ تحقیقات کرائی جائیں۔

انہوں نے چین اور روس سے اپیل کی کہ وہ ان تحقیقات میں شامل ہوں تاکہ حقائق سامنے آ سکیں۔

سلامتی کونسل میں پاک-بھارت کشیدگی پر غور ممکن

دوسری جانب اقوام متحدہ کی سلامتی کونسل کی موجودہ صدر ریاست، یونان نے پاک-بھارت کشیدگی کے تناظر میں ممکنہ اجلاس بلانے کے امکان کا عندیہ دیا ہے۔ یونانی سفیر انجیلوس سیکیریس نے نیویارک میں صحافیوں کو بتایا کہ اگر فریقین میں سے کسی نے باضابطہ طور پر درخواست دی تو اجلاس بلایا جا سکتا ہے۔

سیکیریس کے مطابق، “یہ اجلاس کشیدگی کو کم کرنے میں مدد دے سکتا ہے اور فریقین کو اپنے خیالات کے اظہار کا موقع فراہم کرے گا۔”

تنازع کی جڑ اور بڑھتی ہوئی کشیدگی

یہ پیش رفت ایک ایسے وقت میں سامنے آئی ہے جب پہلگام حملے کے بعد بھارت نے الزام عائد کیا ہے کہ اس واقعے میں پاکستان کے عسکری عناصر ملوث ہیں، جسے پاکستان نے یکسر مسترد کر دیا ہے۔

حالیہ دنوں میں لائن آف کنٹرول پر بھی فائرنگ کے واقعات میں اضافہ ہوا ہے، جب کہ سفارتی سطح پر کشیدگی تیزی سے بڑھ رہی ہے۔ ماہرین کے مطابق، دونوں جوہری ہتھیاروں سے لیس ہمسایہ ممالک کے درمیان تناؤ عالمی امن کے لیے خطرناک ثابت ہو سکتا ہے۔