بھارت کے زیر انتظام کشمیر: فوجی افسر کی اہلیہ کے خلاف حساس معلومات غیر ملکی اداروں کو دینے کے الزام میں مقدمہ درج

جموں(ڈیلی اردو) بھارت کے زیر انتظام کشمیر کے شہر جموں میں پولیس نے ایک فوجی افسر کی اہلیہ کے خلاف حساس معلومات جمع کرنے اور انہیں مبینہ طور پر غیر ملکی خفیہ اداروں تک پہنچانے کے معاملے پر مقدمہ درج کرلیا ہے۔ پولیس اس بات کی تحقیقات کر رہی ہے کہ آیا ملزمہ نے واقعی کوئی خفیہ مواد یا اہم معلومات بیرونی اداروں کے ساتھ شیئر کی تھیں۔

ذرائع کے مطابق مقدمے میں چین سے وابستہ افراد کے ساتھ ممکنہ روابط کا پہلو بھی زیرِ تفتیش ہے۔ ملزمہ کا تعلق بھارتی ریاست تلنگانہ سے بتایا جاتا ہے اور وہ اپنے فوجی افسر شوہر کے ساتھ جموں میں مقیم ہے۔

اطلاعات کے مطابق جمعہ کے روز گاندھی نگر پولیس اسٹیشن میں آفیشل سکریٹس ایکٹ اور بھارتیہ نیائے سنہتا کی متعلقہ دفعات کے تحت مقدمہ درج کیا گیا۔ اس کے بعد ڈپٹی سپرنٹنڈنٹ آف پولیس کے عہدے کے ایک افسر نے ملزمہ سے پوچھ گچھ کی۔

پولیس ذرائع کا کہنا ہے کہ ابتدائی تحقیقات میں تاحال اس بات کی تصدیق نہیں ہوسکی کہ ملزمہ نے کوئی حساس معلومات غیر ملکی اداروں کو فراہم کی تھیں۔ اسے ابھی گرفتار بھی نہیں کیا گیا۔ تفتیش کے دوران اس کے ممکنہ بیرونی روابط، معلومات جمع کرنے سے متعلق سرگرمیوں اور مقدمے کے پس منظر کا جائزہ لیا جا رہا ہے۔