بیروت پر اسرائیلی حملہ، حزب اللہ کے سینئر کمانڈر علی موسی دقدوق 5 ساتھیوں سمیت ہلاک

بیروت (ڈیلی اردو رپورٹ) لبنان کے دارالحکومت بیروت کے جنوبی مضافاتی علاقے ضاحیہ پر اتوار کے روز اسرائیلی فضائی حملے میں حزب اللہ کے سینئر کمانڈر علی موسی دقدوق اپنے 5 ساتھیوں سمیت ہلاک ہو گئے۔

اسرائیلی فوج کے مطابق علی موسی دقدوق حزب اللہ کے اہم کمانڈروں میں شمار ہوتے تھے اور اسرائیل کے خلاف مختلف عسکری کارروائیوں میں مبینہ طور پر مرکزی کردار ادا کرتے رہے۔ اسرائیلی فوج کا دعویٰ ہے کہ انہوں نے 2007 میں پانچ امریکی فوجیوں کے اغوا اور ہلاکت کی منصوبہ بندی بھی کی تھی۔

دوسری جانب لبنان کے سول ڈیفنس ادارے نے بتایا ہے کہ حملے کے بعد ملبے تلے سے کم از کم تین افراد کی لاشیں نکالی گئی ہیں، جبکہ متعدد افراد کے زخمی ہونے کی اطلاعات ہیں۔

لبنانی سرکاری خبر رساں ادارے این این اے کے مطابق حملے میں کم از کم 15 افراد زخمی ہوئے ہیں، جبکہ متعدد رہائشی عمارتوں اور دکانوں کو بھی شدید نقصان پہنچا ہے۔

ریسکیو ٹیمیں متاثرہ علاقے میں امدادی کارروائیوں میں مصروف ہیں اور خدشہ ظاہر کیا جا رہا ہے کہ ملبے تلے مزید افراد بھی موجود ہو سکتے ہیں۔

واضح رہے کہ اسرائیل نے دعویٰ کیا ہے کہ ضاحیہ میں حملہ حزب اللہ کے اہداف کو نشانہ بنانے کے لیے کیا گیا، جبکہ اس واقعے کے بعد لبنان اور اسرائیل کے درمیان کشیدگی میں مزید اضافہ ہونے کا خدشہ پیدا ہو گیا ہے۔