جرمنی میں امریکی ایف 16 لڑاکا طیارہ گر کر تباہ ، پائلٹ محفوظ

 برلن(ڈیلی اردو) جرمنی میں امریکی فضائیہ کا ایف 16 لڑاکا طیارہ حادثے کا شکار ہوکر تباہ ہوگیا، تاہم طیارے میں موجود پائلٹ نے بروقت پیراشوٹ کے ذریعے چھلانگ لگا کر جان بچالی۔

امریکی فوج کے مطابق حادثہ مغربی جرمنی میں واقع اسپانگڈاہلم ایئر بیس سے معمول کی تربیتی پرواز کے دوران پیش آیا۔ ایف 16 طیارہ چار جنگی طیاروں پر مشتمل تربیتی مشن کا حصہ تھا اور واپسی پر حادثے کا شکار ہوا۔

فوجی حکام کے مطابق پائلٹ کو بحفاظت طیارے سے باہر نکلنے کے بعد طبی امداد فراہم کی جا رہی ہے، جبکہ ہنگامی امدادی ٹیموں نے حادثے کی جگہ پر کارروائی شروع کردی۔

حادثے کے بعد تشکیل میں شامل باقی تین ایف 16 طیاروں نے اپنا رخ تبدیل کیا اور رامشٹائن ایئر بیس پر بحفاظت لینڈنگ کی۔

امریکی فوج نے واقعے کی وجوہات جاننے کے لیے باقاعدہ تحقیقات شروع کردی ہیں۔ حکام کا کہنا ہے کہ تحقیقات مکمل ہونے کے بعد طیارے کے حادثے کی اصل وجہ سے متعلق مزید معلومات سامنے آسکیں گی۔