جزوی جنگ بندی کے باوجود لبنان میں اسرائیل اور حزب اللہ کے درمیان جھڑپیں جاری

بیروت/یروشلم (ڈیلی اردو) اسرائیل اور حزب اللہ کی جانب سے امریکہ کے جزوی جنگ بندی منصوبے کو قبول کرنے کے باوجود جنوبی لبنان میں جھڑپیں جاری رہیں۔

امریکی صدر ڈونلڈ ٹرمپ نے پیر کو کہا تھا کہ انھوں نے دونوں فریقوں سے بات کی ہے اور دونوں نے ’فائرنگ روکنے پر اتفاق کیا۔‘

ٹرمپ کا یہ بیان ایسے وقت میں سامنے آیا جب ایران نے خبردار کیا تھا کہ لبنان میں اسرائیلی فوجی کارروائیاں امریکہ اور ایران کے درمیان جنگ بندی کے لیے خطرہ ہیں۔

لبنان کا کہنا ہے کہ حزب اللہ نے اس منصوبے کو قبول کیا ہے جس کے تحت وہ اسرائیل پر حملے روک دے گی اور اسرائیل لبنانی دار الحکومت بیروت پر حملہ نہیں کرے گا۔

اسرائیلی وزیر اعظم بنیامین نیتن یاہو نے بھی اس معاہدے کی تصدیق کی، تاہم انھوں نے کہا کہ اگر ’حزب اللہ ہمارے شہروں اور شہریوں پر حملے بند نہیں کرتی‘ تو بیروت پر حملے کیے جائیں گے۔ ان کا یہ بھی کہنا تھا کہ اسرائیلی افواج جنوبی لبنان میں اپنی کارروائیاں جاری رکھیں گی۔

اگرچہ بظاہر جنگ بندی بڑی حد تک قائم دکھائی دیتی ہے، تاہم رات کے دوران مزید تشدد کے واقعات سامنے آئے۔

حزب اللہ کا کہنا ہے کہ اس کے جنگجوؤں نے جنوبی لبنان کے قصبوں حداثہ اور بیّادہ میں اسرائیلی ٹینکوں کو میزائلوں اور گولہ باری سے نشانہ بنایا۔

اسرائیلی فوج کے مطابق منگل کی صبح لبنان سے داغے گئے دو میزائل مار گرائے گئے اور اس حملے میں کسی کے زخمی ہونے کی اطلاع نہیں ہے۔

لبنان کی سرکاری خبر رساں ایجنسی نے جنوبی علاقوں میں اسرائیلی حملوں کی اطلاع دی ہے اور کہا کہ دبین کے قصبے میں ایک شدید دھماکے سے علاقہ لرز کر رہ گیا۔