جموں و کشمیر: مبینہ دہشتگردوں کی ویڈیو سامنے آنے پر سکیورٹی فورسز کا سرچ آپریشن

دہلی(ڈیلی اردو) بھارت کے زیر انتظام  جموں و کشمیر کے ضلع ڈوڈہ میں رام ٹنڈ چوٹی پر چار مبینہ دہشتگردوں کی موجودگی کی ویڈیو سامنے آنے کے بعد سکیورٹی فورسز نے علاقے میں بڑے پیمانے پر سرچ آپریشن شروع کردیا۔

حکام کے مطابق مقامی افراد کی جانب سے بنائی گئی مبینہ ویڈیو پیر کی شام سکیورٹی اداروں کے علم میں آئی، جس کے بعد جنگلات، پہاڑی راستوں اور بلند مقامات پر اہلکاروں کو متحرک کردیا گیا۔

رام ٹنڈ، جسے رام کنڈ بھی کہا جاتا ہے، ادھم پور کے سیوج دھار علاقے کے قریب واقع دشوار گزار اور گھنے جنگلات پر مشتمل پہاڑی علاقہ ہے۔ ماضی میں بھی اس خطے میں مبینہ دہشتگردوں کی نقل و حرکت اور جنگلاتی علاقوں میں چھپنے کے خدشات سامنے آتے رہے ہیں۔

سکیورٹی ذرائع کے مطابق منگل کی صبح ادھم پور سے فوج، پولیس اور سی آر پی ایف کی اضافی نفری بھی علاقے میں پہنچائی گئی۔ اہلکار پہاڑی ڈھلوانوں، جنگلات اور مختلف راستوں کی تلاشی لے رہے ہیں۔

ابتدائی اطلاعات میں بتایا گیا ہے کہ ویڈیو میں دکھائی دینے والے گروپ میں تین غیرملکی اور ایک مقامی مبینہ دہشتگرد شامل ہوسکتا ہے، تاہم سکیورٹی اداروں کی جانب سے اس کی حتمی تصدیق نہیں کی گئی۔

آخری اطلاعات تک سکیورٹی فورسز کا مبینہ دہشتگردوں سے براہ راست سامنا نہیں ہوا تھا۔ علاقے میں نگرانی مزید بڑھاتے ہوئے جنگلات اور پہاڑی راستوں میں تلاش کا سلسلہ جاری رکھا گیا ہے۔