جنوبی وزیرستان اور باجوڑ میں پاکستانی فورسز کے آپریشنز، 35 شدت پسند ہلاک

اسلام آباد (ڈیلی اردو/اے پی پی/بی بی سی)  پاکستانی فوج نے دعویٰ کیا ہے کہ صوبہ خیبر پختونخوا کے دو اضلاع میں انٹیلیجنس بیسڈ آپریشنز کے دوران 35 شدت پسند ہلاک جبکہ فائرنگ کے تبادلے میں 12 فوجی اہلکار بھی مارے گئے۔

آئی ایس پی آر کے مطابق پہلا آپریشن ضلع باجوڑ میں شدت پسندوں کی موجودگی کی اطلاع پر کیا گیا، جس میں 22 شدت پسند مارے گئے۔ فوج کا کہنا ہے کہ کارروائی کے دوران اسلحہ اور گولہ بارود بھی برآمد ہوا۔

ترجمان کے مطابق دوسرا آپریشن ضلع جنوبی وزیرستان میں کیا گیا جہاں مزید 13 شدت پسند ہلاک ہوئے۔ تاہم ان جھڑپوں کے دوران شدت پسندوں کی فائرنگ سے 12 فوجی اہلکار بھی مارے گئے۔

آئی ایس پی آر کا کہنا ہے کہ یہ شدت پسند متعدد دہشت گرد حملوں میں ملوث تھے اور ان میں ’افغان شہری‘ بھی شامل ہیں۔ فوج نے دعویٰ کیا کہ حملہ آور ’انڈین اسپانسرڈ‘ تھے اور افغان سرزمین پاکستان کے خلاف استعمال ہو رہی ہے۔

فوجی ترجمان نے کہا کہ پاکستان افغان عبوری حکومت سے توقع کرتا ہے کہ وہ اپنی ذمہ داریاں نبھائے اور اپنی سرزمین کو دہشت گردی کے لیے استعمال نہ ہونے دے۔

یاد رہے کہ طالبان حکومت کے وزیر دفاع ملّا یعقوب نے برطانوی خبر رساں ادارے بی بی سی کو دیے گئے ایک انٹرویو میں پاکستان کے الزامات کو مسترد کرتے ہوئے کہا تھا کہ پاکستانی سکیورٹی ادارے اپنی کمزوری چھپانے کے لیے افغانستان پر الزام تراشی کر رہے ہیں۔ ان کے بقول تحریک طالبان پاکستان (ٹی ٹی پی) اور بلوچ علیحدگی پسند اپنی کارروائیاں پاکستان کے اندر بڑے شہروں تک کرتے ہیں۔