جنوبی وزیرستان اور جنڈولہ میں سکیورٹی خدشات کے پیش نظر کرفیو نافذ، نقل و حرکت پر مکمل پابندی

پشاور (ڈیلی اردو) ویب ڈیسک: جنوبی وزیرستان لوئر کی تحصیل برمل اور ضلع ٹانک کے سب ڈویژن جنڈولہ میں سکیورٹی خدشات کے پیش نظر کل 24 جولائی بروز جمعرات صبح 6 بجے سے شام 7 بجے تک کرفیو نافذ کر دیا گیا ہے۔ ضلعی انتظامیہ کی جانب سے جاری نوٹیفکیشن کے مطابق اس دوران ہر قسم کی نقل و حرکت، بازاروں، مارکیٹوں اور تجارتی سرگرمیوں پر مکمل پابندی عائد ہوگی۔

برمل میں وانا تیارزہ گیٹ، کرب کوٹ، تنائی تا عزیز آباد چوکزامچن، خمرنگ، رغزئی، شولام تا وانا کے راستوں پر داخلہ سختی سے ممنوع قرار دیا گیا ہے۔ صرف ایمرجنسی کی صورت میں پولیس یا سکیورٹی فورسز کی اجازت، شناختی کارڈ اور ضروری کاغذات کی فراہمی پر سفر کی اجازت ہوگی۔ اعلامیہ میں ہدایت کی گئی ہے کہ سکیورٹی فورسز کی گاڑی نظر آنے کی صورت میں شہری اپنی گاڑی کو 100 میٹر فاصلے پر سڑک سے نیچے اتار لیں۔

ادھر ڈپٹی کمشنر تنویر خٹک کے مطابق جنڈولہ میں بھی کرفیو کے دوران کوڑ سے جنڈولہ تک مرکزی شاہراہ ہر قسم کی ٹریفک کے لیے بند رہے گی، اور تمام دکانیں و مارکیٹیں مکمل طور پر بند رہیں گی۔