جنوبی وزیرستان جھڑپیں: 9 طالبان اور 2 فوجی ہلاک

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع جنوبی وزیرستان میں سکیورٹی فورسز اور طالبان کے درمیان شدید جھڑپوں میں کم از کم 11 افراد ہلاک ہوئے ہیں۔

ڈیلی اردو کے مطابق جھڑپیں اعظم ورسک روڈ پر کلوشہ کے مقام پر ہوئیں جہاں فورسز نے فضائی اور زمینی کارروائیاں کیں۔ اس دوران 9 طالبان کی لاشیں برآمد ہوئیں، جبکہ دو فوجی اہلکار بھی ہلاک اور متعدد زخمی ہوئے۔ فورسز نے علاقے میں چار نئی چوکیاں قائم کر کے سرچ آپریشن شروع کر دیا ہے۔

گزشتہ روز لوئر دیر کے علاقے میدان، سر بانڈہ میں شدت پسندوں کے خلاف سرچ اینڈ اسٹرائیک آپریشن میں آٹھ فرنٹیئر کور اہلکار ہلاک اور 13 زخمی ہوئے تھے، جبکہ ایک اہلکار تاحال لاپتہ ہے۔ اس حملے کی ذمہ داری کالعدم تحریک طالبان پاکستان (ٹی ٹی پی) نے قبول کی تھی۔

یاد رہے کہ دو روز قبل خیبر پختونخوا کے تین اضلاع شمالی وزیرستان، مہمند اور بنوں میں کیے گئے آپریشنز میں کم از کم 19 عسکریت پسند ہلاک کیے گئے تھے۔ مہمند کے علاقے گلونو میں 14 جبکہ شمالی وزیرستان کے دتہ خیل میں چار عسکریت پسند مارے گئے تھے۔